Hezkidetza lana ikastetxean jorratu nahi badugu atal garrantzitsu bat orientazioarena da.
Orientatzeak neska-ikasle eta mutil-ikasleekin harreman jarraituak izatea suposatzen du, entzun, informazioa eman, lagundu, izateko, espresatzeko eta aske aukeratzeko espazioak zabaltzea da. Orientazioan genero ikuspegia era egokian txertatzen bada ikastetxe guztian eragina izango du.
Irakasleriaren parte handi baten iritziz, eskola mixtoa, mixtoa denez, eskola hezitzailea da.Iritzi edo ikuspegia aldatzeko irakasleek hainbat ikerketen berri izatea ezinbestekoa da. Gure gizartean emakume eta gizonen artean sortzen den “Genero arraila” eta beren zergatiak denon interesekoak direla uste dut. Nolako eragina dituzten gure espektatibek eta familiriarenak, gure bizipenek…. gure ikasleek egiten dituzten aukeraketetan edo emaitza akademikoetan neretzat, pertsonalki, adierazgarriak izan dira.Badago, azkenengo urteetan eta hezkidetza plana abian jarri zenetik, irakasle askoren aldetik gaiarekiko jakinnahia. Mintegira hurbiltzen direnean eta ikasturterako lehenengo gaiak proposatzeko eskatzen zaienean irakasleek, orokorrean, irakaslearen autohausnarketarako tresna bat lantzea eskatzen dute.Irakasleek euren eguneroko lanean eta ikasleekin interakzioan zer mezu komunikatzen duten eta diskriminaziorik egiten duten jakin nahi dute.Baina, ikastetxe guztiek ez dute formazio bera jasotzen edo interes berdina jartzen berdintasunaren alde lana egiterakoan.Horregatik eta azken urte hauetako lana ezerezean gelditu ez dadin, irakasle guztientzat formazio trinko bat bermatu beharko litzateke.Momentuan lanean daudenentzat, zein irakasle izateko bidean daudenentzat.
Behin formazio hauek jaso ondoren zer lan egin beharko dugu “genero arraila” ixteko? Ikastetxean tutoretza plan hezkidetzaile bat egoteak lanari urteetako jarraipena ematea ziurtatzen digu. Tutoreek aukera dute era koordinatu batean gai bat gelan lantzeko (DBH-ko egiturak, askotan, ahalbidetzen ez dutena). Horretarako, denon artean gai honi buruz bizi ditugun kontradizioak eta tirabirak landu eta hausnartu beharko genituzke. Gure diskurtsoak eta praktikak bateratu, ikastetxeko espazioak genero ikuspegitik aztertu, neskek bizi dituzten dilemei (Lee Anne Bell) garrantzia eman, eta eurekin landu. Ziur nago 6 dilema horietako batean baino gehiagotan euren burua ikusiko dutela.
Baina zein ezaugarri izan beharko lituzke tutoretza plan on batek?
R. J. García, J. M. Moreno, eta J. C. Torrego, (1993) autoreek lan horretarako hurrengo irizpideak ematen dituzte:
• Ekintza-plana izan behar du, hau da, ikasgelan garatu behar da (ezin da maila teoriko batera mugatu).
• Ez dute adituek landu behar, gauzatuko duten irakasleek baizik.
• Ikastetxearen iragana (lorpenak, esperientziak...) eta oraina (beharrak) hartu behar ditu kontuan etorkizuna proiektatzeko.
• Planean agertzen diren proposamenak errealitatearekin kontrastatu behar dira.
• Aldatzea eta hobetzea izan behar du funtsezko helburu.
• Plan bat ezin da amaitutzat hartu, aplikatzen den heinean berrikusi, aldatu eta uneko beharretara egokitu behar baita.
Eta baliabideak zer? tutoretza plan on batek baliabide egokiak eta beharko ditu. Gaur egun ikastetxeetan iraganean baino baliabide teknologiko gehiago daude edozein gai era atsegin baten landu ahal izateko. Horietako batzuk bideoak dira. Iraupen gutxikoak eta gaiari buruz eztabaida bat hasteko edo bukatzeko balio dutenak.
iruzkinik ez:
Argitaratu iruzkina