Errepresentazioaz

Errepresentazioaren inguruko hausnarketa egiteko, besteak beste, espazio fisikoei eta birtualei erreparatu diet.

Polemika eta katramila ugari eragin ditu kale-izendegiak azken boladan, eta hori da seguru asko duen garrantziaren erakusle argiena. Hutsuneak-hutsune, gabeziarik bada, hori emakumeen presentziari dagokiona da. Berdintasunaz bolo-bolo mintzten garen honetan, matxistak dira kale bazterrak. Beraz, emakumeek hirian duten presentzia sinbolikoa areagotu egin behar da.

Hernanin, azken urteetan Kardaberaz deitu izan zaion kaleak berreskuratu du garai bateko izena: ANDRAKALE

Hezkuntza-eremuetan erreparatuz, ezinbestekoa da ikastetxe bakoitzak bere patioak berrantolatzea.

Mundu birtualean, genero kontuetan, gauzak berdin errepikatzeko arriskua dago. Ikerketek argi eta garbi islatzen dute hori. Horrenbestez, oso garrantzitsuak dira sarean biderkatzen ari diren emakumeen eta gizonen errepresentazio ez estereotipatuak bistaratzeko saiakerak.

Iazko ikastarokide baten posta:

Marijose Soto Marcos-ek, bere postean, Lorea Jauregi EHUko irakasleak eginako tesiaren berri ematen du; izenburua honakoa du: "Haur Hezkuntzakogelen antolaketa espaziala eta erabilera”. Bertan, espazioari buruzko hausnarketa eta proposamen ugari bildu ditu Loreak. Oso interesgarria!

Sentsibilizaziorako interesgarria:

Grisa eta iluna dela, futbolak protagonismo gehiegi duela, natur gune gehiago nahi dituztela… Haurrek beraiek eskolako jolastokia aztertu eta eraldatzeko proposamenak egin dituzte Durangoko Kurutziaga ikastolan. Jolaserako eta harremanetarako espazio anitzak eta aberatsak lortzea da helburua: "Ikastolako jolastokia amesten". 

Eremu hezitzaileetan / jendartean landu beharreko erronkak, besteak beste:

-Jolas eremuen diseinuak eta erabilerak aztertu sexuaren, adinaren eta aniztasunaren ikuspegitik.

-Ikastetxean komunen gaiaren inguruan hausnarketa egin.

-Hedabideetatik irudi eta eduki sexistak edota emakumeen aurkako indarkeria justifikatzen edo bultzatzen dutenak kendu.

-Ikasleek kontsumitzen dituzten entretenimendu bisual desberdinetan sexu-genero estereotipoak zalantzan jarri.

-Ikus-entzunezko alfabetizazioa eta literarioa eskaini ikasleei.

-Herriko kaleen izendegia aztertu, emakumeen presentzia areagotzeko asmoz.

-Emakumeentzako segurtasun eskasa duten gune ilunak identifikatu herrian.