Mendebaldean
mundua dikotomien arabera ulertzen ikasi dugu, zuria/beltza, eguna/argia,
handia/txikia… eta logika horretan sortuak izan dira arra/emea,
emakumea/gizona, femeninoa/maskulinoa… bezalako binomioak.
Eraikuntza sozial eta
kultural bati erantzuten diotela ahaztu gabe barneratzen ditugu, ezaugarri
naturalak balira bezala. Mundua ulertzeko modu hau ideologiaz kargatuta dago,
inguratzen gaituen oro sailkatuta egotea eskatzen du. Pentsaera hori da genero
zapalkuntzak emateko erabiltzen dena, baina baita, arraza, kultura, etnia,
hizkuntza eta herriak zapaltzeko erabili izan dena ere.
“Sexu-genero estereotipoak”, emakumeok alua eta
gizonezkoei zakila izateagatik atxikitzen zaizkigun Rolak dira. Maskulinoa eta
femeninoa.
“Genero ikuspegiak”, generoa eraikuntza sozial gisa
detektatzen du, eta honen aurrean jarrera kritiko bat adierazten du ikasitakoa
deseraikiz eta alternatibak sortuz. Kontzientzia hezkidetzailea izatea
ezinbestekoa da.
Kontzientzia hezkidetzailea sortu asmoz “Beldur
Barik” lehiaketan parte hartu genuen “Abañoko Gaztiek” aisialdi proiektuko
gaztetxoekin. Jolasaren baitan sortzen diren sexu-genero estereotipoak
detektatu, eta hauek deseraikitzearen beharraz aritu ginen.
Gazteak, sexu-genero
bereizketaren ondorioz ematen diren bereizkeria egoerez kontziente diren arren,
natura eta biologiaren ondorio direla sinesten dute, egungo sistema
patriarkalaren eraginaz ohartu gabe.
Beldur Barik 2015
lehiaketara aurkezteko grabatu genuen bideoa; Nahi duguna izateko!
Hezkidetza tresna
garrantzitsua da gazte eta hezitzaileongan eragiteko. Gure indarrak, motibazioa
eta gogoa bertan zentratu nahi ditugu, jendarte eraldaketarako. Horretarako,
ezinbesteko da hezkuntza komunitatean gabiltzanon (hezitzaile, haur, gazte,
irakasle, argitaletxe…) arteko elkarlana.
Gaur
egungo eskola hezkidetzailea ez dela kontuan hartuta, erronka handia dugu
aurretik. Hezitzaileok ere generoan sozializatuak izan garenez, sexu-genero
ikuspegia izan behar dugu edozein jarduera edo eremutan.
Hezkuntza hezkidetzailerako
landu beharreko eremu proposamena:
- Ikastetxearen helburuak: Pertsonaren garapen osorako lagungarriak izan behar dute.
- Balioak eta konpetentziak: Parekidetasuna, elkartasuna eta askatasuna.
- Antolamendua: Guztion partaidetza bultzatzea oso garrantzitsua da.
- Edukiak: Partaideen garapen integrala bermatzeko balio behar dute.
- Metodologia: Eragile guztien ekintzan eta partaidetzan oinarritzen da.
- Ebaluazioa: Partaide guztiengan ematen diren aldaketak behatu eta kontrastatzea, partaidearen integraltasuna kontutan hartuz eta balorazio sistema irizpide ez androzentrikoetatik sortuz.
- Espazioa eta denboraren erabilera: Erabilerak orekatua eta parekidea izan behar du.
- Materiala: Ez dute balore eta eduki sexistarik izan behar.
- Hizkuntza: Erabilera, hitzen balioa…
iruzkinik ez:
Argitaratu iruzkina