Inguruan hezkidetzari buruz zer
dakiten ikertzen ahalegindu naiz. Horretarako, hiru galdera egin ditut eta
baldintza bakarra jarri dut: hezkuntza arlokoak ez izatea galderak erantzungo
zutenak.
Baldintza hori ezarri dut, uste
dudalako hezkuntzan lan egiten duen orok jakin beharko lukeela hezkidetza zer
den. Beste oinarrizko ezagutza bat bezala. Aldi berean, ni hezkuntza mundukoa
ez naizenez, interesgarria iruditu zait esparru honetan esku hartzen ez dugunon
ezagutzak eta iritziak biltzea.
Honakoak izan dira egindako
galderak:
- Badakizu zer den hezkidetza?
- Nola definituko zenuke?
- Garrantzitsua iruditzen zaizu?
Galderen erantzunak irakurtzean bi
motatako pertsonak aurkitu ditut: alde batetik, hezkidetza zer den badakitenak,
eta bestetik, hezkidetzari buruzko ezagutzarik ez dutenak. Zerk bereizten ditu
bi pertsona horiek? Feminismoak.
Egindako ikerketaren arabera,
feminista kontsideratzen direnek eta talde feministan militatzen dutenek ezagutzen
dute hezkidetza, definitzeko gai dira eta garrantzitsua iruditzen zaie.
Feminismoa distantziara bizi dutenen artean, berriz, hezkidetza hitza arrotza
da.
Baina, bigarren pertsona mota
hauei, hezkidetza nire ikuspegitik zer den azaldu eta #Igorertek eginiko argitalpeneko
arrazoiak partekatu ditut eurekin: hezkidetza garrantzitsua da genero
indarkeriak desagertzeko, generoek potererik ez izateko, sentimenduak lantzen
ikasteko, pentsamendu kritikoa sustatzeko eta pertsonak pertsona sentitzeko. Hauek, interesarekin entzun dute esandakoa eta
beraiei ere garrantzizkoa iruditu zaie.
Eta bigarren pertsona mota hauek,
agian, ez dira etorkizunean irakasleak izango baina bai (edo ez) guraso,
izeba-osaba, lagun, tutore edota ume edo nerabe baten erreferente. Eta bigarren
pertsona mota hauek izango dira noizbait norbaiten sozializazio prozesuaren
parte. Beraz, zergatik ez dugu hezkidetza gizarteratzen? Zeragatik ez dugu hezkidetza
hitza bera jende askoren ahotan jartzen?
