Jarraipena???

NOVIOS TÓXICOS

Kaixo, lagunak!!         

    Ez dakit blog hau mantentzeko funtzioetan sartzen den, baino, bada ezbada ere...asteburu honetan hain zabaldua dagoen "XLSEMANAL" aldizkarian agertzen den artikuluaren linka bidaltzen dut. 

     Seguruenik, askok irakurri izango duzue, eta, seguruenik, akatsak ikusi izango dituzue, baina ikasle askok irakurri/ ikusi egiten dute eta gelan taldeko irakurketa eta hausnarketa egiteko baliogarria iruditzen zait.

http://www.finanzas.com/xl-semanal/magazine/20160501/novios-toxicos-9736.html

         Ondo izan eta BETI AURRERA!

Bidean gaude!

NIRE ESPERIENTZIA

*Informazioa/baliabideak lortu

* Errealitatean adierazleak detektatzen ikasi

*Aurrera jarraitzeko gaitasuna handitu

*Interes berdinak duen taldearen parte sentitu

*Gaia lantzearen beharra biziki sentitu

ABESTIA

Joan Manuel Serraten “Cantares” (Caminante no hay camino, se hace camino al andar.)

ADJEKTIBO+IZEN+SENTIMENDU

·         *SAKONA + TRINKOA + ABERASGARRIA

·        * ELKARLANA + ERRONKA + ITXAROPENA

·       *  ADOREA + BELDURRA + MAITASUNA

NEURE BURUAZ / BESTEEZ / ELKARREKINTZAK

*Emakumeen ezagutza eta beraiekiko harremanak aberasten naute

*Gure ezaugarri eta bizimodu desberdinak izan arren oso gauza garrantzitsua konpartitzen dugu

* Eskuzabalak izan dira

KANPOKO LEKUKOEI

*Ez gelditzeko, aurrerapausoak emateko gai honetan sakontzeko.

ITXAROPENAK / NAHIAK / ASMOAK

*Nire ikastolan aurrera eramango dugu HEZKIDETZA

*Ez ahaztu helburua: pertsona askez eta tratu oneko harremanez osatutako gizartea.

*Gai honen inguruan sakontzen jarraitu (ikastaroan eskainitako material pila aztertzetik hasita).

   Bukatzeko,eskerrak eman nahi dizkizuet bide honetan gidari eta bidelagun izan zareten guztiei. Espero dut aurrerantzean bide honetan, edo beste batean, topo egitea.

Tratu onak, bidea edo utopia?

                        LABURPENA                           

Gai honen inguruan aipatu nahi dudan lehenengo ideia garrantzitsua izenburua da:

"TRATU ONAK: HEZKUNTZA-KOMUNITATEAN HARREMANETARAKO ARDATZ"

   HARLUXET hiztegi entziklopedikoan, honako ARDATZ hitzaren esanahia agertzen da (besteen artean):

Lan edo ideia baten gune garrantzitsuena.

    Formakuntza-ikastaro honetan oso gai garrantzitsuak landu ditugu, eta jada bukaeran ARDATZ bezala definitzea TRATU ONAK oso deigarria iruditu zait, eta oso positiboa, pertsona guztien, egoera guztien, bizitza-ziklo guztietan oinarri gisa itxaropena eta harreman modu  “humanizatzailea” iruditzen zaidalako.

                                         

     Ideia garrantzitsuak:

*Eskolak beste botere sozialek mantentzen dituzten genero-estereotipo sexista berdinak mantendu eta zabaltzen ditu, beraz, ez du berdintasunean hezten.

*Zoriontsu izateak norberaren izaerarekin, bizipenekin eta inguruarekin lotura du.

*Emozioek izugarrizko garrantzia dute ikasleek ikasteko era edo ahalmenarekin.

*Ikasleek harreman parekideak eraikitzeko gaitasunak garatzea nahi badugu, hezkuntza-sistema hezkidetzailea ardatz izan behar du.

*Elkarbizitza positiboak norbera bere identitatearekin gustura egotea lortzen duena eta neska-mutilak munduaren hobekuntzarako konprometitzen laguntzen dituena da.

*Kalitatezko elkarbizitza denen ongizatea, dominazio-mendekotasun harremanak  gainditzea, eta elkarren arteko eta ingurua hobetzeko ardura sustatzen dituena da.

*Tratu onak harremanen ardatz izateko eta gure artean kalitatezko elkarbizitza lortzeko, ezinbestekoa da zaintzari baliopositiboa ematea eta denon ardura dela ulertzea.

Balorazio pertsonala

  *Bereziki gustatu zait gai hau, eta zentzu handia eman diot besteen ondoren lantzeari, aldarrikapen, borroka, errebindikazio eta irmotasunaren oinarrian tratu onak edukitzea beharrezkoak diren jarrera horiei helburu itxaropentsua ematen dielako.

    Askotan UTOPIA hitza etortzen zait burura, hori delako pertsona askok aldaketaren hitzen edo proposamenen aurrean erantzuten dutena (mespretxuz, maiz), baina uste dut TRATU ONEN harremanak utopia baino gertuago ditugula, egunerokoan eman baitaitezke pausoak horren alde.

IKERKETA, BALIABIDE, PROPOSAMENA

    Oso aberasgarria (eta aurrera eramateko sinplea) iruditzen zait Marian Morenok planteatzen duen “HAMABOSTALDIKO ERRONKA”.

                                       

    Ikusi ditudan materialetan (eta Marianek berak emandako azalpenetan), parte hartzen duten gazteek oso bizipen positiboak dituzte, eta praktikan jarritako norberaren gaitasuna eta besteekiko zaintzaren asetasunak esperientzia berria eta aberasgarria izan da.

DATUAK ETA ONDORIOAK

  Oso interesgarria iruditu zait Eustatek argitaratu duen ikerketa baten datuen eta ondorioen artikulua:

“Denbora Aurrekontuen Inkesta, 1993-2013” izeneko ikerketan, azken hogei urteetan nola aldatu den denboraren erabilera egunerokoan azaltzen da.  Ikerketa hau Marina Sagastizabal eta Marta Luxan soziologoek gidatu dute.

     1993tik 2013ra bitartean aldaketa nabarmenena jaso dituen jarduera  etxeko lanena da. Emakume eta gizonen arteko aldea txikitu egin da, baina oraindik handia da.

  Etxeko lanen esparruan, ohiko eta ezohiko jarduerak banatzen ditu Eustaten inkestak.

     1993an ohiko jarduerei lotuta (jana, etxeko garbiketa eta arropa) 3 ordu eta 15 minutu pasatzen zituzten emakumeek eta ezohikoei (konponketak, erosketak, kudeaketak eta erdi-aisiak) ordubete;

     2013an, aldiz, 2 ordu eta 25 minutuko eta 44 minutuko dedikazioak dituzte.

     Gizonek, berriz, gero eta denbora gehiago eskaintzen diete orokorrean etxeko lanei eta, gainera, 2008tik aurrera ohiko jarduerei ezohikoei baino denbora gehiago eskaintzen diete.

     Nahiz eta kopuru hauek emakume eta gizonen arteko aldea txikiagotu den azaldu, oraindik emakumeek ohiko jarduerei eskaintzen dieten denbora gizonezkoek dedikatzen diotena bider 2,6 dugu. Argi dago, beraz, batere parekidea ez den banaketa baten aurrean gaudela oraindik.

                                                       

       Gai honetan hausnartu dugun  etxeko pertsonak zaintzeari dagokionez, aldaketa mantsoagoa eta txikiagoa da.

     1998an txikiagotu egin zen genero-haustura, baina, 2003tik aurrera, handitu. Ikerlariek nabarmendu dutenez, zaintzaren zama oraindik ere emakumearen gainean erortzen da nagusiki. Alderdi honetan, beraz, parekidetasunerako pausoak ahulagoak izan dira.

                                              

ERRONKAK

 *Erronka nagusiena, zalantzarik gabe, HEZKUNTZAREN ERDIGUNEAN PERTSONA, bere osotasunean, JARTZEA da.

                                        

                                             

Neska eta mutilak indarkeria matxistaren aurka!!

LABURPENA

   Gai honen garrantzia eta ondorioez jabetzeko, honako ideiak oinarrizkoak iruditu zaizkit:

*Indarkeria matxista desagertzea nahi badugu, beharrezkoa da gizonek bere erantzukizuna onartzea, ez emakumeen gain soilik uztea.

*Indarkeria matxista desagertzeko bi tresna baliogarrienak honako hauek dira:  emakumeen ahalduntze indibidual eta kolektiboa (autodefentsa feminista bidez), eta gizonen inplikazioa maskulinitate berriak sortuz, gaur arteko maskulinitate heterosexual hegemonikotik at.

*Maitasun erromantikoa indarkeria matxistaren oinarrian dauden sexismoa eta misoginia transmititzeko tresna indartsua da.

*Maitasuna birdefinitu behar da, emakumeen identitatearen erdigunetik kenduz eta maila bereko zaintza oinarri duten harremanak bultzatuz.

*MIKROMATXISMOEK (oharkabean pasatzen diren eguneroko jarrera matxistak) genero- estereotipoen arauak betetzen ez dituzten emakumeak eta gizonak erasotzen dituzte.

       

*LGTBIQfobia presente dago gure gizartean, nahiz eta hizkuntza “politikoki zuzena” erabiliaz, erakundeek kolektibo hauen onarpena aldarrikatu.

*Gizontasun hegemonikoa alda daiteke; horretarako ezinbestekoa da gizonek gizon izateagatik dituzten pribilegioak identifikatzea eta baztertzea.

*Gizon-estereotipoetatik askatzeko gizonek emozioen arloa (emozioak adierazten trebatu), zaintzarena (erantzukizuna hartu eta esparru pribaturako gaitasunak garatu) eta indarkeria matxistaren aurkako jarrera aktiboa landu behar dira.

*Autodefentsa feministak sustatzen dituen gaitasunen artean, “ez” esateko eskubidea eta edozein irain eta indarkeria  mota identifikatu eta salatzeko eskubidea oinarrizkoak dira.

Balorazio pertsonala

*Hasierako bideotik abiatuta, gaia oso interesgarria iruditu zait. Emakumeen “autodefentsa kontzeptua” orain arte baino zabalago ulertzen lagundu dit; oso beharrezkoa iruditu zait emakumeen arteko elkartasunaren ideia eta, baita ere, beldurrik gabe bizitzea eskubidea dela azpimarratzea.

*Mikromatxismoei buruzko hainbeste material desberdin eskaintzeak asko lagundu dit, adibide txiki praktikoen bidez gure arteko eguneroko eta leku guztietako egoerak direla argi ikusteko.

                              

                                

BALIABIDE, IKERKETA, PROPOSAMENA

   Gai honen inguruan material asko gustatu zaizkit eta eskolan oso erabilgarriak iruditu zaizkit. Guztien artean, JAIEN INGURUKOAK nabarmenduko nituzke.

       Uste dut oso lagungarria dela, batez ere, gaztetxoen artean, indarkeria matxistaren aurkako ekintzak eta ideiak bizitza arruntan dibertigarriak diren egoera eta jarduerekin erlazionatzea, horrelako egoeretan konpartitzeko prest egoten garelako eta gure alderdi ludikoek (musikak, dantzak, elkartasunak) denori, gizon eta emakumeoi ezaugarri positiboak garatzen laguntzen digutelako.

    Bestalde, hain maiz festetan edo topaketetan gertatzen diren eraso eta indarkeria-ekintzak ikustarazi behar direla (eta horietan hasten diren gaztetxoei bereziki) iruditzen zaidalako.

                                                 

                                    

DATUAK ETA ONDORIOAK

     EJko “HERRIZAINGO, JUSTIZIA ETA HERRI ADMINISTRAZIO SAILA”k argitaratutako “Emakumeen aurkako indarkeria matxista EAEn: pertzepzioa, eragina eta segurtasuna” dokumentuan (48.orrialdean), honako datu hau agertzen da, besteak, beste:

       Eusko Jaurlaritzaren Herrizaingo Saileko Genero Indarkeriaren Biktimei Arreta emateko Zuzendaritzaren datuek adierazten dute 4.285 biktimizazio erregistratu zirela guztira 2010. urtean (3.500 emakume inguru izan ziren biktima), 2002. urtean erregistratu zen kopuruaren bikoitza.

    Argi dago handitu egin dela emakumeen aurkako indarkeria-kasu erregistratuen kopurua. Igoera honen arrazoia, alde batetik, gero eta gehiago identifikatzen dela  indarkeria matxista izan daiteke,  bestetik, indarkeria jasaten duten emakume gehiagok salatzen dutela, edo, azkenik, indarkeria ugaltzen ari dela.

    Batetik, positiboa iruditzen zait honen atzean indarkeriaren aurkako sentsibilizazioa baldin badago, baino, izugarria iruditzen zait kopuru hori eta kopuru horrek islatzen duen sufrimendu eta injustizia.

ERRONKAK

*Bai mutilak eta bai neskak indarkeria matxista desagertzea beraien eginbeharra dela jabetzea.

                                     

*Eguneroko egoera eta jarduerak aztertzea mikromatxismoak identifikatzeko eta ondorio hezitzaileak

   ateratzeko (adibidez, Emakundek  atera -berri duen kanpainaren bitartez).

GATAZKEN ERABILERA POSITIBOA

 LABURPENA              

*Bakea modu tradizionalean ulertuta (estatuen arteko gerra-gatazka eza), indar militarra behar da hori mantentzeko.

*BAKEA edozein motatako (fisikoa, egiturazkoa, kulturala) indarkeriarik eza da.

*Eremu askotan, eskola barne, gatazkak “normaltasuna eta egokitasunaren” disfuntzio gisa ikusi eta landu izan dira.

*Bizitzak eta harremanek berezkoa dute gatazka. Gatazka konpontzeko erak egiten du hau positiboa edo negatiboa.

*Bakea berdintasun-harremanak izatea da eta prozesu bat da.

*Agresibitatea ez da indarkeria: agresitbitatea gizakien bizi-iraupen sena da; indarkeria, berriz, norberari edo besteei kalte egiteko indarra edo boterea erabiltzea da.

*Biolentzia-eza filosofiak bidezkoa ez den jarrerak aztertu eta konszienteki jabetzera, honen salaketa egin eta horri aurre egitera inolako indarkeriarik erabili gabe bultzatzen du.

*Gatazken aurrean jokabide femenino eta maskulinoak desberdinak izaten dira.

*Gatazkaren aurrean inplikatuta daudenen helburuak, interesak eta beraien arteko harremanak kontutan izan behar dira (genero-kulturak hauetan duen eragina kontutan izan behar dugu).

*Lankidetza (helburuak eta harremanak garrantzitsuak dira) da gatazkak tratatzeko era positiboa.

*Gatazka-egituran pertsonak (beraien izaera, egoera …), prozesua ( gatazkaren historia) eta arazoa (zergatiak eta ondorioak) hartu behar dira kontuan.

*Feminismoak Zaintzaren Etikarekin oso lotuta dauden ekarpenak eta irizpide aldaketak egin ditu gatazken trataeran: honetan testu ingurua, beharrak eta elkar ardura aztertzen dira gatazken zergatien oinarri gisa.

*Gatazkak lantzeko kultura positiborako landu beharreko bost eremuak genero ikuspegitik bideratzeak, eskoletan gatazkak era hezkidetzailean tratazen lagunduko digu:

-kontzientzia hartzea

-curriculuma

-banakako tutoretza

-partaidetza

-antolakuntza

BALORAZIO PERTSONALA

    Gai hao OSO interesgarria iruditu zait. Materialak probetxugarriak eta, egia esan, piskat gaindituta ikusten dut nere burua. Tutoretzaren inguruan hausnartzean, gai honek denbora eta ardura eskatzen digu, eta genero-ikuspegiak erantsi egiten dio behar duen osotasuna.

IKERKETA, BALIABIDE, PROPOSAMENA …

 “Ikastetxeetan gatazkak ELKARLANEAN ebazteko estrategiak” dokumentuan dinamika lagungarriak eskaintzen dira gatazkak tratatzeko. Zehaztasun handiz azaltzen dira eta aldagai asko hartzen dira kontuan.

                             Ez da genero ikuspegia zehazten, baina hezitzaileok gara ikuspegi hori gatazkaren oinarrian egon daitekeenean detektatu eta ikasleei detektatzen lagundu beharko diegunak.

“Berdintasunean Hezten Emakumearen Institutua eta Berdintasun Ministerioaren laguntzaz FETE-UGTk egindako programa” dokumentuan, hezkidetza eta harremanen trataera egokirako oso material interesgarria iruditu zait.

 Blanca Kerejeta irakasleak HIK HASI aldizkarian idatziriko artikuluan: “Haurrek, elkarren arteko gatazkak haien artean konpondu behar al dituzte? Kasu horretan jazarpenak izateko aukera handiagoa al da? Zer egin behar dute irakasleek?”, oso orientabide garrantzitsuak eskaintzen dizkigu.

DATUAK ETA ONDORIOAK

Eusko JaurlaritzaK argitaratutako “BIZIKIDETZA ETA BAKEAREN ALDEKO HEZIKETA EAEKO IKASTETXEETAN” dokumentuan,“Ikasleen arteko portaera baztertzaileak” (52.orrialdean) egindako analisian, genero aldagaia kontuan hartuta, dio:

“Mutilak neskak baino baztertzaileagoak dira. Hala ere, portaera mota horietan ez dago hainbesteko desberdintasunik; batik bat, kideen itxura fisikoa eta eskola porrota edo lorpena direla -eta gertatzen diren diskriminazioetan.

    Mutilen nahiz nesken iritziz mutilek portaera okerragoak izan arren, horien erantzunetatik sexuen arteko gerra dagoela ondoriozta daiteke: mutilei portaera desegoki gehiago leporatzen dizkiete neskek, mutilek berek baino; eta neskei horrelako portaera gehiago leporatzen dizkiete mutilek, neskek berek baino.

     Mutilak neskak baino okerrago portatzen dira, DBH n batxilergoan baino gehiago, eta bi etapa horietan lanbide heziketan baino gehiago. Ikastetxe publikoek mutilen portaera baztertzailea azpimarratzen dute; aitzitik, ikastetxe pribatuek portaera negatibo gehiago ikusten dituzte neskengan. Horrek guztiak adierazten du 12 eta 18 urte bitarteko ikasleek, sexuaren arabera, helduen artean nagusi den ereduaren antzeko portaerak dituztela.”

Azpimarragarriak:

*itxura fisikoa bazterkeriaren arrazoi nagusietako bat da.

*sexuen arteko “gerra” gatazken interpretazioan islatzen da.

*genero ikuspegitik gizartean dagoen jarrera baztertzailea dute 12-18 urteko gazteek ere.

ERRONKAK

-kontzientzia hartzea: irakasleen eta komunitate osoaren prestakuntza genero-ikuspegian

-curriculuma: ezezagunaren aurrean dugun beldurrak sortzen dituen gatazkak, sentimenduen

                      adierazpenak bultzatzen dituzten edukiekin landu

-banakako tutoretza: Zaintzaren Etikan oinarritu norberaren eta besteen balorapena eta errespetua

                                  bizitzeko

-partaidetza: gatazkak lantzerakoan ikasle guztien partaidetza bultzatu

-antolakuntza: espazioen eta denboren neska eta mutilen parekidetasuna bultzatu.

HEZIKETA AFEKTIBO-SEXULA, HIPOKRESIAREN GAINETIK

LABURPENA                                 

Honako ideia hauek gaia ulertzen lagundu didate:

*Sexua eta, baita sexualitatea ere, eraikuntza soziokulturalak dira.

*Sistema patriarkalak ugalkortasuna helburu duen sexualitate eredua ezarri du eta horretatik kanpo dauden sexualitate-eredu anitzak ez ditu normaltzat hartzen, askotan, gaixotasun edo nahasketa bezala ikusita; beraz, plazerra koitoarekin lotzen du eta ugalkortasunerako “balio” ez duten gorputz atalak (klitoria) edo praktikak baztertu egin ditu.

*Sistema patriarkal honetan pertsona guztien heterosexualitatea aurresoposatu egiten da.

*Azken urteetan sexua kontsumo produktua bihurtu da (jendea hipersexualizatua aurkezten da hedabideetan, nesken objektibazioa oso argia delarik; sexu-praktika zorionaren bidea bezala, eta, beraz, kontsumitu “beharra” bezala agertzen da; prostituzioak eta pornografiak jarraitzen du).

*Maitasun erromantikoaren eredua miresten jarraitzen dugu, horrek dakartzan emakumeen menpekotasuna eta indarkeriaz jabetu gabe.

*Homosexualitatea, oraindik, ezkutatzen den errealitatea da.

*Eskola espazio ez-ziurra bezala ikusten da.

*Eskolak arestian esandako eredua mantentzen laguntzen du (familia eredu tradizionalaren nagusitasuna, maitasun erromantikoa, suposatutako heterosexualitatea…).

*Heziketa afektibo-sexuala boluntarioen eta hezitzaileen sentiberatasunaren arabera uzten da.

*Afektibitatea eta harreman positiboak lotuta daude.

*Heziketa afektibo-sexual hezkidetzailea izateko heteroarauaren eta sexu-binarismoaren mugak zabaldu behar ditu.

*Eskolaren komunitate osoak hartu behar du erantzukizuna zeregin horretan.

IRITZI PERTSONALA

    *Askotan aipatu dut dagoeneko urte asko daramatzadala irakaskuntzan eta heziketa afektibo-sexuala “aparkatuta” dugula uste dut. 

     Urte hauetan, noiz behinka, formakuntza saioak /ikastaroak egin izan ditugu eta asko aldatu da ikasleekin lantzeko modua; gero eta erosoago eta naturalago sentitzen garela uste dut.

     Hala ere, gure eredua, heteroarautua izaten jarraitzen du, zeharka moduan aipatzen baita homosexualitatearen aukera, eta ez besterik (trans…).

                                             

     Benetan, hausnarketa eta gogoeta sakona behar dugula uste dut. Gaia oso erakargarria iruditu zait.

IKERKETA / PROPOSAMENA

                Oso aberatsa eta erabilgarria iruditu zait STEILASen “GENERO ETA ANIZTASUN SEXUALERAKO GIDALIBURUA”.

  Gida osoak merezi du lasai irakurtzea, baina “Nola jokatu LGTBIQfobia ematen denean” (20.orrialdean) eta 24.orrialdeko “Egunerokotasunean hainbat kontu zaindu behar ditugu” izenburupean eskaintzen diren jarraibideak bereziki kontutan hartu beharrekoak iruditu zaizkit.

   Neurri batzuk aurrera eramateko zailtasun handiagoa ikusten dut, ikastetxean adostasuna egon behar duelako, baina jarraibide xume batzuk gure eskuetara daude momentu honetan (aukeratzen dugun materiala, erabiltzen dugun hizkera …).

DATUAK ETA ONDORIOAK

   BERDINDUK argitaratutako “ANIZTASUN AFEKTIBOSEXUALAREN AURREKO JARRERAK ikasgeletan” txostenean, hainbat daturen artean, honako honek arreta eman dit:

     Ikasleriaren %60 eta 62a bitartean jokaera homofoboen lekuko izan dira, hala nola, irainak, laidoak eta esamesak ikusi edo entzun dituzte. Bestalde, ikasleriaren ia erdiak arrazoi berarengatik bazterketak ikustea aitortu dute.

     Segituan etorri zait burura 2015eko azaroaren 25erako ikastetxeetan zabaldutatko leloa: “EZ IKUSIARENA EZ EGIN”.

       Lan horretan ari gara ikastetxeetan, baino garbi ikus dezakegu badaudela arrazoi franko horretan indartsu jarraitzeko.

ERRONKAK

*Beste aurreko hainbat gaietan bezala, honetan ere, ezinbestekoa iruditzen zait eskola-komunitate osoak bere gain hartzea transmititzen eta mantentzen ari garen errealitate mugatu eta deformearen jabetze-lana, horretarako, behar dugun formakuntza eta gure buruaren bizipenen onarpenarekin hasita.

*Jasotako mitoak eta era hipokritan erabili diren “egien” azterketa egitea, gure inguru hurbilera begiratuz.

*Eskolan eguneroko lanetan ematen ditugun aurrerapausoak azaldu, ikusgarri egin, inguruan ere zabaldu daitezen eta kutsatu dezaten.

                        

ANIZTASUN SEXUALA, EZKUTUKO ERREALITATEA

                                                           

LABURPENA                     

   

*Patriarkatuak sustatzen dituen bizi-programak kulturalak direla kontutan izatea garrantzitsua da; halaber, teoría feminista batzuen arabera, generoa eta sexua ere eraikuntza soziokulturala dira.

*Identitate eta orientazio guztiek eduki behar dute lekua gizartean.

*Eskolak “harremanen geografia” sortzen du.

*Enbrioiaren sexua sexu-kromosomek definitzen dutenaren baieztapena ez da guztiz egia.

*Sexu-banaketa bitarrak ez du islatzen aniztasun sexual erreala; hala ere, legalki bi aukera bakarrik daude (gizon / emakume).

*Norbait emakume, gizon edo beste modu batera sentitzen den jakiteko hoberena pertsona berari galdetzea da.

*Gizartean, pertsonari ezarri zaion sexua eta berak sentitzen duena bate ez datozenean, pertsona hori nahastuta edo oker dagoela pentsatzen da (lehen, gaixo zegoela), eta zuzendu beharra dagoela.

*Sistema heteropatriarkalak suposatzen du pertsona guztiak heterosexualak direla.

*Gorputza tresna politiko gisa erabiltzea sistema heteropatriarkalak inposaturiko mugekiko erresistentzia bidea izan daiteke.

BALORAZIO PERTSONALA

     Niri gai honek ezinegona sortarazi dit. Homosexualitatea eguneroko bizitzan, ohiko harremanetan (talde batzuetan) integratuta dago, baina sexu aniztasunak, gorputz anitzak…ezkajintasuna (nire ezjakintasuna) agerian uzten dit, eta ezezagunak diren gauzak, askotan egiten duten modura, beldur pixka bat ematen dit.

      Bestalde, irakurri eta ikusi ditudan testigantza batzuk (bereziki, ARRAKALAN dokumentala) bizimodu askeago baten “utopia”(¿?) hurbilago eraiki dezakegula sinistarazten dit.

IKERKETA EDO PROPOSAMENA




     Alejandro Jodorowskyk Beatriz Preciadori egiten dion ELKARRIZKETA bat aipatu nahi dut. Bertan, Beatriz Preciadok sexua eta generoa “espacios plásticos” direla esaten du, eta kulturak eta politikak eraikitzen dituztela.
Gorputzaren erabilera tresna politiko gisa ere azaltzen du.

     Elkarrizketan zehar (nahiz eta askotan ez utzi nahi duena lasai azaltzen), Alejandro Jodorowskyk beste pertsonen ezagutza, beste ideien eta bizipenen ezagutzaren garrantzia islatzen du. Eta uste dut hori jarrera-gakoa dela gure ikuspuntua (nirea) zabaltzeko.

DATUAK ETA ONDORIOAK

  *Oraindik, 76 herrialdeetan homosexualitatea ilegala da eta 5 herrialdek heriotza-zigorra ezartzen diote.
    Mundu globalizatuan gaude eta, nahiz eta urrun bizi errealitate horiek, guregan (eta gure ikasleengan) eragin handia dute: maila desberdineko pertsonak daudela pentsatzera eta desberdin baloratzera bultzatzen baitute.

    *Homofobia eskolan izenburupean, Donostian emandako hitzaldi batean, Jose Ignacio Pichardo Madrilgo Unibertsitate Autonomoan Gizarte Antropologian doktore eta Madrilgo Lesbiana, Gay, Transexual eta Bisexualen Kolektiboko (Cogam) kideak, datu hauek eman zituen:

     -Nerabeen %76k diote homosexualak balira institutuan ez luketela esango, arazoak izango zituztelako
     -Orokorrean, eta estatu osoan eginiko ikerketak kontuan hartuta, nerabeen herenak inguruk jarrera homofoboak ditu. Alde ona da nerabeen gehiengoak errespetua badutela sexu aniztasunarekiko. Baina arazoa da beste %30 horrek bere legea ezartzen duela institutuan. Zergatik? Gainerakoentzat ukitzen ez dituen gai bat delako.

Eskolan “aipatzen ez dena ez da existitzen” leloa indarrean dagoela iruditzen zait.






ESKOLAREN ERRONKAK


*Gai hau azaleratu, ikusgarria egitea da, nire ustez, erronka nagusia eta larria.

* Hezitzaileon formakuntza, Irakasle-Fakultatea barne.

*Gurasoen eta, orokorki, gizarte osoaren aurrean ikustarazi aniztasunaren errealitatea eta “ez ikusiarena” egitearen eta jazarpenaren ondorioz pertsona askok bizi duten sufrimenduaz jabetzea.

 Gai honen inguruan, oso elkarrizketa interesgarria iruditu zait:

   Aitor Martxueta: “Homofobiaren eta bazterketaren aurkako politikak diseinatu eta aplikatu behar dituzte ikastetxeek"

Identitatea, bide bukaezina

                             

         

GAIARI BURUZKO LABURPENA                          

  *Identitatea beste pertsonengandik bereiztea eta, aldi berean, talde baten parte izatea uztartzen dituen nor banakoaren alderdia da. Identitatea bizitza osoan zehar garatzen da.

Sexu-identitatea baldintza biologikoetan oinarritzen da;  genero-identitatea, berriz, genero estereotipoek, gizarteak eta kulturak transmititutako eraikuntza da. Pentsaera bitarra inposatu da gure kulturan (emakumea-femeninoa/gizona-maskulinoa), sexu-genero sisteman oinarrituta.

Genero-adierazpena genero-identitatearekiko adostasuna edo desadostasuna erakusteko modu desberdina da. Gizarte heteropatriarkalean, teoría psikologikoetan eta justifikazio biologikoetan oinarrituta, sexu-diskriminazioa ezarri da. Ezarritako arauetatik kanpo dauden guztiak patologizatu egin dira.

Teoría eta ekintza feministentzat ardatza izan da identitate femeninoa, hauek identitate maskulinoa eta femeninoaren eta maskulinoaren arteko harremanak eztabaidagarri jarri dituzte. Ondorio argia da identitateak anitzak direla eta prozesu irekia dela. Gure gizartearen joera nagusia izan da gizonen identitatean autokontzeptu positiboa garatzea (makro-nortasuna) eta emakumeen identitatean, berriz, gutxiespena nagusitzea (sub-identifikazioa). Genero-identitatearen garapenean FAKTORE ASKO daude  http://www.elmundo.es/salud/2004/572/1084572003.html

(gurasoen eredua, gizarte-ikaskuntza, hizkuntzaren eragina…).

Gizarte heteropatriarkalean, sexu-genero sistema inposatu da eta, honetan, gizonezkoa-maskulinoa bikaina dela eta emakumezkoa-femeninoa desbideratze eta gabezia dela pentsatzen da. Pentsakera hau historian zehar zabaldutako teoría filosofiko eta psikologiko askok (Aristoteles, Aquinoko Tomasek…) eragin dute.

Izakia PRODUKTU KULTURALA http://cear-euskadi.org/diccionario/eu/identidad-de-genero/ dela onartzen badugu, eta identitatea eraikitzea prozesu bukaezina, orain arte sexu-genero sistema ezarri duten ikuspegi deterministak gainditu daitezke.

Heziberi 2020 hezkuntza-ereduak proposatzen dituen oinarrizko zehar-konpetetntziak bizitzako alor eta egoera guztietan arazoak eraginkortasunez konpontzeko behar direnak dira, eta eskolako arlo edo ikasgai guztietan landu eta sendotu behar dira.

BALORAZIO PERTSONALA

Zaila egin zait kontzeptu desberdinak ulertzea. Garrantzitsua iruditzen zait inposaturiko moldeak aldagarriak direla sinestea eta, baita ere, horretan hezkuntzak eragin handia duela pentsatzea.

Dokumentuan azaltzen den errealitatearen atzean dagoen sufrimendua  ikusgarri egiteak laguntzen dit formatzea eta lanari ekitearen derrigortasunaz jabetzea.

  

HEZIBERRI 2020 ETA IDENTITATEEN GARAPENA

     Ikastetxean eta ikasgelan inklusioa abian jartzeko orientabide metodologikoen artean, 45.orrialdean honako hau agertzen da:

 • Genero‐aniztasuna. Gizarte‐konstruktu bat da generoa, ikasle guztien oraina eta geroa baldintzatzen dituzten desberdintasun bidegabe askoren berri ematen diguna.

Alderdi hori lantzeko, curriculum ezkutuan kontutan hartu beharko genituzke:

            *Neska eta mutilei estereotipoek ezarritako ezaugarri eta balioak orekatzen  lagundu, gabeziak sendotuz eta gehikeriak murriztuz (bai beraien arteko harremanetan, eta baita irakasle-ikasle harremanetan ere).

  

*Kontutan hartu hizkuntzaren bitartez transmititzen duguna, norberak bere identitatea  aske garatu dezan lagundu dezaion (eredu desberdinak normaltasunez azalduz, eta errespetuzko adierazpen askea sustatuz).

     

            *Ikasgai guztietan “desberdinak” izateagatik baztertuak edo gutxietsiak izan diren pertsonen presentzia eta garrantzia azpimarratu.

            

INGURU HURBILEAN GENERO-IDENTITATEEN INGURUAN 

EMANDAKO AURRERAPENAK

 SINESMEN FALTSUEN DESEGITEAK

*Tutoritza saioetan elkarren arteko harremanak ERRESPETUZ  eta beste persona den bezala baloratzeko jarrerak bultzatzen dira, elkarrizketa eta dinamika desberdinekin.

       Irakasle askok, guk jasotako hezkuntza-sisteman emandako eredu on bakarraren helburua desegin dugu.

*Lankidetza metodologiaren bitartez, bakoitzak duen gaitasuna partekatzea eta besteenak onartu eta indartzeko jarrerak bultzatzen dira.

      Norgehiagoka aritzea balioak hezkuntzan izan duen nagusitasuna desegin behar izan dugu (edo, gutxitu, behintzat).

*Emakumeen ekarpenak azaltzeko lan zehatzak egin dira.

      Horretarako konturatu behar izan dugu ezkutuan izan ditugula eta zenbaterainoko baliogarritasuna duten.

*Azken urteetan, Batxilergoan orientazio prozesuan laguntzeko etortzen diren lanbide desberdinetako ordezkariek, konbentzionalak ez diren pertsonak eta lanbide batzuk eskaini dituzte.

      Prestigiodun ohizko lanbideetatik kanpo, pertsonak garatzeko beste lanbideak ikusgarri jartzearen garrantziaz jabetu gara.