ESKERRIK ASKO

Ez bada erraza izan ere astez aste lan guztiei aurre egitea, ikastaro honek bizitzari begiratzeko beste modu baten aurrean jarri nau. Eskerrik asko! Entregatu beharrekoak hobeto edo okerrago egongo ziren, baina bizitzari begiratzeko era berri batekin jarraituko dut aurrera, ez nik bakarrik nire ingirukoek ere bai, benetan aberasgarria izan da.Eskerrik asko! Kalean elkar ikusi eta ezagutuko ez bazaituztet ere hilabete hauetan gertuko sentitu zaituztet. Eskerrik asko!

ANITZAK GARELAKO

·Gaiari buruzko gogoeta pertsonala:

Aste hasieran garbi nuen orain dela urte batzuk izan nuen ikasle bat aipatuko nuela han edo hemen. Pasa dira urte batzuk, batxilergoan klaseak ematen ari nintzen orduan, ikasle guzti haien artean bazen neska bat beste herri batetik etorria, arazoak izan omen zituen bere jaioterriko ikastetxean, beraz gurera etorri zen. Bazuen zerbait desberdina, agian hori izan zen bere lagunek ez onartzeko arrazoia… Ikasturte hura amaitu eta pertsona haren pista galdu nuen gure herriko aldizkarian honako elkarrizketa hau ikusi nuen arte. Hain txiki ikusten zen persona hark, herri guztiaren aurrean azaldu du bere bizipena. A ze poza.

http://uztarria.eus/aktualitatea/1429280710

 Astean zehar egindako ibilbidearen ondorioz konturatu naiz eremu hezkidetzailean lan egiteko asko dugula, pertsona askeak heztea dela gure helburua, beraien buruaren jabe diren `pertsonak heztea, beraien bizitzan protagonistak diren ikasleak, nor diren aukeratu, erabaki, hautatu, erratu, ikasi eta jaikitzen dakitenak. Aske direnak.Garrantzitsua da argi eta garbi esatea jendea ez dela sexuaren arabera baloratzen.

 Iazko post bat: Haizea Egigurenena hautatu dut, gelan lantzeko hainbat baliabide aurkezten ditu. http://hezkeh0506.blogspot.com.es/2016/02/aniztasun-sexualaz-hausnarketa.html

·Sentsibilizaziorako baliagarria izan daitekeen irudi/bideo/gida bat:

https://www.youtube.com/watch?v=cwUftlI4pHw

Zein dira zure ustez hau guztia eremu hezitzaileetan/jendartean lantzeko erronkak?

Sexu genero sistema bistaratzea

Ikasle bakoitzaren errepikaezintasuna askatasunean garatzeko eskubidean oinarritzea

Heteronormatibitatetik aldentzea

Aniztasuna modu ez hierarkikoan, duintasunez eta errespetuz bistaratzea

Sexu-genero rolak eta genero aginduak betetzen ez dituzten ikasleei inguru segurua eskeintzea.

Edozein aurreiritziren ondoriozko indarkeria-egoeraren aurrean esku hartzea

Aniztasun ororen alde et elkarbizitza positiboaren alde lan egitea

Heziketa afektibo ez heteronormatiboa sustatzea

NONDIK NORA

Ikasturte honetan buru belarri murgilduta nago tutore lanetan, beraz orientazioa eta aukera akademikoei buruz arituko garela ohartu bezain laster etorri zait asteroko tutoritza ordua burura,bertan, ikasleei entzun,  beraien intereseko diren gaiak landu,  aukera desberdinak mahai gainean jarri, beraien bidea egiteko estrategiak ematen saiatu… lan interesgarri eta garrantzitsua.

Konturatu naiz tutoritzako ordu hauek genero ikuspegitik planifikatzea ezinbestekoa dela, ez hezkidetza lantzen dugunean bakarrik, baizik eta edozein gai lantzen dugunean.  Gure helburua ikasleen garapen integrala lortzea da, beraien bizitza pertsonal, familiar, sozial zein profesionalean orienta daitezen.

Gai honen garrantzia zehaztu beharko banu, esango nuke lan honetarako ezinbestekoa dela emakume zein gizon izateari esanahi librea ematea, batzuen eta besteen ekarpenak, sentimenduak eta interpretazioak onartuz.

Astean zehar agertu diren datu guztiak dira esanguratsuak, hala ere nabarmendu nahiko nuke, neska-mutilak beraien ikasketak aukeratzerakoan ez direla aske, ingenieritza edo informatika askoz mutil gehiagok hautatzen dute, neskek aldiz osasun zientzietara jotzen dute, gainera emakumeek %24 gutxiago irabazten dute batez beste.

http://hezkeh0506.blogspot.com.es/2016/01/orientazioa-eta-zer-gehiago.html.

Post hau aukeratu dut, bertan baliabide interesgarriak aurkezten direlako

CURRICULUMA ETA BALIABIDE DIDAKTIKOAK

Guztion ardura da gizarte hezkidetzaile baten alde egitea, neska-mutilen bakantasuna onartzen duen heziketa bermatzea, pertsona guztiak parekidetasunean eta diskriminazio ezean heztea, ikasleei estereotipo eta diskriminazioei aurre egiteko tresnak ematea.

Ikastetxearen hezkidetza-eredua egiteko gida argitaratu zuen emakundek 1997an, horretarako kontutan izandako iturburu soziologiko, psikologiko, pedagogiko eta epistemologikoek baieztatzen dute, besteak beste, historian zehar garatu diren hezkunzta ereduak sistema patriarkalaren arabera finkatutako genero maskulino eta femeninoaren hierarkizaioan oinarritu izan direla, non gizonek makronortasuna, neurriz kanpoko autoestimua garatzen dituzten eta emakumeek aldiz bere burua gutxiezten duten.

Errealitate honi aurre egiteko ezinbestekoa dugu ikastetxeetan diagnostiko on bat egin, edukiak, metodologia eta materialak aztertu, hezkidetzaileak diren materialak sustatu eta ez direnak ahal bada baztertu eta bestela moldatu, ordezkatu edo ikuspegi kritikoz aurkeztea.

Uste dut sistematikoki materiala hezkidetzaturik ez egotearen arrazoiak bat baino gehiago direla; formakuntza eta sentsiblizazioa beharrezkoak dira, naiz eta diskurtso hezkidetzailea barneratuta izan, teoria hori praktikara eramateak lan asko eskatzen du, eta ez lan indibiduala, koordinatutako talde lana baizik. Ordu asko eskatzen ditu materiala aztertu, aldatu eta berria sortzeak. Prest gaude gure ordutegitik kanpo lan hori hartzeko? Prest gaude gure metodologia aldatzeko?

Hezkidetza ikastetxe gehienetanmahai gainean dagoen lana dirudi, orain arte lortutako lanen barruan sartuko nuke, hala ere, sentsibilizazio eta formazio lan hori praktikara pasatzea falta da, metodologia eta edukiak egokitzea, espazioa egokitzea, emakumeak bisibilizatzea, hizkuntza ez sexista eta ez bortitza erabiltzea... Guzti hau praktikara eramaten duten ikastetxeak ere izango dira, gurea ere saiakera egiten ari da, hala ere irakasle guztien arteko koordinazioa behar da, guztien inplikazioa. Pausoz pauso!

Iazko post bat

http://hezkeh0506.blogspot.com.es/2016/02/baliabide-didaktikoetatik-abiatuz.html

ERREPRESENTAZIOAZ

Aste honetan errepresentazioaz eta denboraren kudeaketaz aritu gara. Garrantzi handia du emakumearen eta aniztasunaren presentziak espazio fisiko, birtual eta ikus-entzunezkoetan.

Gure herrietako kaleen izendegiak, oroigarriak… bizi dugun gizarte ereduaren isla dira, Azpeitian 77 kale edo auzotatik bik bakarrik daramate emakumeen izena, Olazko amaren plaza eta Magdalena auzoa, biak ama birjinak.

"Espazio publikoan emakume arrunten edo nabarmendu direnen lanari eta bizitzari buruzko erreferenterik ez izateak bere horretan eusten dio esfera publiko eta pribatuaren arteko banaketa sexudunari”.

Espazio birtual eta ikus-entzunezkoetan berriz sexu genero sistema apurtzen duten ereduak aurki badaitezte ere, oso gutxi dira eta ez daude presente gure eguneroko bizitzan. 

Ezinbestekoa da emakumeen presentzia gure hiri eta ikastetxetan presente egotea, baita espazio birtual eta ikus-entzunezkoetan ikusten ez dena ez delako existitzen.

Guzti hau eremu hezitzailean lantzeko:

• ·         Patioen eta ikastetxeko beste eremuen antolaketa aztertu eta beharrezkoak diren aldaketak egin.
• ·         Neska eta mutilen parte hartzea ahalik eta parekideena izaten saiatu
• ·         Herrian izan diren emakume esanguratsuen biografia ikertu
• ·         Ikus-entzunezkoetan agertzen diren emakumezko eta gizonezko ereduak ikasleekin aztertu eta balore sexistak identifikatu.

Azpeiti eta Azkoitiko hezkidetzako foroek, udalaren eta harremonitz elkartearen laguntzaz “jolas denbora” egitasmoa jarri zuten martxan Azpeiti eta Azkoitiko ikastetxeetan. Hiru urtez ari dira jolas orduetako gunean hezkidetza sustatzen, genero desberdinen arteko harreman justuago eta naturalagoei indarra emanez.
   
http://urolakosta.hitza.eus/2015/02/24/naturaltzat-jotzen-ditugu-erabat-kulturalak-diren-jarrerak/

http://urolakosta.hitza.eus/2015/02/20/jolastokiko-espazioa-modu-parekideagoan-banatzeko-jolas-denbora-egitasmoa-aurkeztu-dute-azpeitian/

Iazko post bat

http://hezkeh0506.blogspot.com.es/2015/12/errepresentazioa-irudikatzen.html

HITZ ETA PITZ

“Hizkuntza ez da gertaera biologiko eta naturala, hizkuntza eskuratze kulturala denez alda dezakegu, hizkuntza aldatzean mentalitatea aldatu egiten da eta mentalitatea aldatzean jarrera aldatu egiten da” Teresa Meana

Hizkuntza, hitzak, esaldiak, gramatika, morfologia, sintaxia… baino askoz gehiago da, elkarrekin komunikatzeko erabiltzen dugu, baita balioak trasnmititu, errealitatea izendatu eta interpretatzeko ere. Hizkuntzak identitateak eraikitzen laguntzen digu, horregatik da hain garrantzitsua hizkuntzaren erabilera ez sexista eta ez bortitzaren kontzientzia izatea. Hizkuntzaren erabileran isladatzen da gizartearen nolakotasuna.

 Euskerak genero gramatikalik ez badu ere, gure gizarte patriarkala islatzen du,  irainetan “alua”, “gizon” hitzaren erabilera anitzetan, hainbat esamoldetan… Hau horrela, ezinbestekoa da hizkuntzaren erabileraren kontzientzia hartu eta berau modu ez sexista batean erabiltzea. Hizkuntzaren erabilera ez bortitzaren garrantzia ere azpimarratu nahiko nuke.

Hizkuntza ez sexista, parekide, errespetuzko, zintzo eta koherente batean sinesten dut. Hau lortzeko erronkak ugari dira:

• -       Erabiltzen dugun hizkuntzaren sexismoaz ohartzea
• -       Genero kutsadura saihestea
• -       Maskulino orokortzailea saihestea
• -       Emakumeen esperientziak eta interesak diskurtsoan barneratzea
• -       Erabiltzen ditugun materialak erreparatzea

Gaur egun hizkuntza eta irudiak elkarri eskutik emanda agertzen dira, beraz euskararen eta irudien erabilera ez sexistarako gida aukeratu dut.

Iazko post interesgarri bat:

Gaiaren inguruko hausnarketa batzuk:

https://www.youtube.com/watch?v=jyVrcM1-9Zs

http://www.ikasbil.eus/web/ikasbil/dokutekako-fitxa?p_p_id=56_INSTANCE_fLB1&p_p_lifecycle=0&p_p_state=normal&p_p_mode=view&p_p_col_id=column-1&p_p_col_count=1&groupId=10138&articleId=1496664

EMAKUMEAK PROTAGONISTA

Emakumeen presentziaz ari gara aste hontan, azpimarratzekoa iruditu zait Begoña Salasek protagonismoari buruz egiten duen hausnarketa. Protagonismoa ezinbesteako da identitatearen garapenerako eta nork bere buruaren baieztapenerako, beraz ezin ukatu emakumearen presentziak duen garrantzia.

Emakumearen ahalduntzea ere nabarmendu nahiko nuke, objektu izatetik subjektu eraginkor izatera pasatzeko gaitasuna, hortan datza emakumeak bere historiaren eta bizitzaren protagonista izatea.

Emakume aintzindari bat aukeratu beharrean, agian aintzidari izan gabe, baina ezarritako rolak gainditzen eta besteen esanei jaramon handirik egin gabe aritu ziren Zuloak-eko neskak aipatu nahi nituzke, baita Anari, Zea mayseko Aiora Renteria, Perlak, Mursego edo garai batean gogor jardun zuen Sorkun ere, gizonen mundua dirudien hortan beraien tokia egin dutelako.

Erronka haundiak dauzkagu mahai gainean eta lan izugarria egiteko, hoien artean:

• ·         Emakumeen ekarkenak ezagutarazi eta baloratzea
• ·         Emakumeak erreferente izan daitezkela erakustea
• ·         Emakumeak ezkutatzeko patriarkatuak erabiltzen dituen mekanismoak azaleraztea
•         Gelan erabiltzen ditugun materialen azterketa hezkidetzailea egitea

Aste honetako gaia ederki laburbiltzen du iazko post honeta.

TRADIZIOA? ETA GENERO IKUSPEGIA?

 Jarrera
 Aniztasuna
 Izaera

 Parekidea
 Askatasuna
eRedua
 Errespetua
 Kultura
 Iraultza
iDentitatea
 Emozioa
dAntza


Jaiak kulturaren islada dira, nolabait gizartearen eredua erreproduzitzen da gure ospakizunetan, gainera, Begoña Arriolak dioen bezala emozioek berebiziko garrantzia dute portaeran, beraz garrantzi handiko ariketa da jai eta ospakizunak genero ikuspegitik aztertzea. Hauxe izan da aste honetako lanetako bat, argi eta garbi ikusi ere bai sexu genero sistema ia ospakizun denetan gehiago edo gutxiago erreproduzitzen dela.

San Valentinen, maitasun erromantikoaren mitoa…Olentzero, androzentrismoa… Halloween eta ihauterietan mozorroetan egiten den sexu bereizketa, emakumeari dagozkion mozorro sexyak… aita eta amaren eguna, kontsumismoa, maskulinitate hegemonikoaren aldarria…

Tradizioaren izenean ohitura ugariri eusten diegu, are gehiago interes politiko eta ekonomikoak atzean ezkutatzen badira. Betidanik horrela izan denez… Tradizioz gurean finkatuta dauden ospakizuenei ezinbestekoa dugu genero ikuspegia ezartzea eta ez betidanik horrela izan delako bere hortan uztea.

Euskal Herrian, jai eta ospakizunak jan edanean ospatzen ditugu, alkohol eta festen izenean hainbat jarrera onartezin justifikatzen dira. Inoiz gertatuko zitzaizuen taberna batetik ateratzean norbaitek ipurditik heldu, atzera begiratu eta mutil kuadrila batekin topo egitea. Beraiei purrustada egin eta gainera - Neska, festak ditun da, ez hai hola jarri… erantzuna entzun beharra.

Beraz, ezinbestekoa da eremu hezitzaileetan jai eta ospakizunen gaiari eustea. Bigarren hezkuntzan lantzeko badira hainbat erronka:

• Gure jai eta ospakizunen jatorria aztertzea, genero ikuspegia ezarriz
• Sexu genero sistema erreproduzitzen duten ereduak era kritikoan lantzea
• Hipersexualizazioa lantzea
• Musika, letra eta dantzak aztertzea
• Tradizioa betikoa delako onartu egin behar da? Hausnarketa egitea
• Ikastetxeetan eztabaida prozesuak martxan jartzea
• …

Baliabide hezkidetzaile bat martxan jartzekotan, honakoarekin hasiko nintzateke Gure jai eta ospakizunen jatorria aztertu eta genero ikuspegia ezartzea. Bigarren Hezkuntzan egiteko ariketa egokia dela uste dut, informazioa bildu, aztertu eta ikuspegi kritikoa ezarri.

Iazko post bat:

http://hezkeh0506.blogspot.com.es/2015/11/jaiak-guztionak-guztiontzat.html

FEMINISMOAZ IKASTEN

     Aste hontan ingurukoei feminista ote diren galdetu diet, kuriositatez… Banekien eztabaida sortuko zela, baita gaian sakontzen lagunduko zidala ere.

          Emakumeen artean erantzun ugari jaso ditut; horixe baietz, ba ez takit… horixe ezetz… Ezetz esaten duten hauek ez dut uste gizon eta emakumeek eskubide berdinak lortzearen aurka daudenik, baina feminismo hitzak halako atzerakada bat sortzen duela ematen du.

Gizon batek edo bestek baietz erantzun didate baina gehienek ezetz, gizonak feminista izan daitezke, ala? Erantzun dit gaur batek. Hauei ere feminismo hitzak atzeraka egiten die.

Ezjakintasun handia dagoela ondorioztatu dut, nire inguruan bai behintzat.

Rosario Carrasco eta Ana Cubilloren definizio honek gaian sartzen lagundu dit:

“Feminismoa gaur egun agintzen duen gizarte sistema, patriarkatua salatzen eta hautsi nahi duen mugimendu sozial, politiko, filosofiko, ekonomiko eta kulturala da. Bere helburua emakume eta gizonen arteko aukera berdintasuna lortzea.

Beraz, feminismoak gizon eta emakumeen eskubide berdinak lortzea du helburu, gainera, oso lorpen garratzitsuetara iritsi da, batzuk aipatzekotan: boto eskubidea, lan eta ikasteko eskubidea, politikan parte hartu ahal izatea… 

Lorpen hauek benetako aurrerapauso izan badira ere oraindik eskubide berdinak izatetik urruti gaude;lan munduan bagaude ere ez dugu berdina irabazten, politikan bagaude ere, gure gaitasunak egunerokoan erakutsi behar dira… 

Hezkuntzan jorratu beharreko gai feministei buruz, bi hauek aukeratu ditut:

Ikasgeletan feminismoa lantzea; zer den, lorpenak, feminismoak…

Emakumeak bistaratzea, historian zehar izan diren emakume zientzialari, idazle, pentsalari… ezagutzera ematea.

 Emakume feminista esanguratsu bat.

OCHY CURIEL: Emakumea, beltza, lesbiana, feminista, pentsalaria, aktibista, artista alternatiboa, bakarlaria, antiarrazista, antisexista, erradikala eta kritikoa. Hegemonikoa denaren kontrako oro biltzen du (Santiago, Dominikar Errepublika, 1963). Egun, Kolonbian bizi da, eta feminismo deskoloniaren erreferentetzat jotzen dute.

Hemen irakurri dezakezue berari egindako elkarrizketa bat.

Eta azkenik iazko post bat:

http://hezkeh0506.blogspot.com.es/2015/11/feminismo-guztiak-besarka-ditzagun.html

NAHIKOA DA!!!

Genero indarkeria “ emakumeek emakume izate hutsagatik jasaten dituzten tratu txar psikologiokoak, abusuak, agresio fisikoak eta ustiapen sexualak dira.”

 Unibertsitateko urte haietan, ohikoa den bezala, pisu batean bizi nintzen, beste 3 lagunekin. Bazkal ondoren telebista ikusten ari ginela, neska bat oihuka entzun genuen, balkoira atera ginen, lehenengo pisuko bikotea zen, mutilak neska iletik tiraka lurretik arraztaka zerabilen panpina bat bailitzan, udaltzainari deitu genion, segituan etorri ziren… Bikote hark batera jarraitu zuen, (guk ezin bagenuen ulertu ere) handik aurrera mutil hura igogailuaren zai ikusten bagenuen, eskaileretatik igotzen ginen bostgarren pisura. Neska hura ikusten nuen bakoitzean bihotzak buelta ematen zidan. Ikasturte hartan beste bi aldiz entzun genituen oihuak, udaltzainari deitu eta segituan etorri ziren. Ikasturte amaieran pisu hura utzi egin genuen, haiek ordea han jarraitu zuten.

Datuak zirraragarriak dira, OMEren datuen arabera munduan emakumeen %35ari eragiten die biolentzia mota honek. Europan 62 milioi emakumek indarkeria fisiko eta sexuala sufritu dute. Zaila zait ulertzea datuak horrela oraindik ere jasaten dugun indarkeria sinbolikoa “komunikazioaren, ezagutzen eta narratiben bide sinbolikoaren bitartez eragiten duena da. Biktimentzako ikusezina da munduko errepresentazioan eta kontaketa misoginoetan emakumean ezezkotasun eta gutxiagotasun esparruan kokatzen baitira “

Baditugu hainbat erronka honi eurre egiteko:

-Hezitzaile eta gurasoentzat formazioa

-Hezitzaileok estereotipoak gainditzea, eredu izatea.

-Ikasgelan erabiltzen den materiala aztertu eta baliabide hezkidetzaileak txertatzea.

-Neskei indarkeriaren aurka beraien burua defendatzen irakastea

-Indarkeria jarrera guztiak bistaratzea.

-…

Iazko postei begira, ez da erraza izan bat aukeratzea. Post honetan ikasleekin mikromatxismoa lantzeko baliabide interesgarriak daude. 

SEXU GENERO SISTEMARI BURUZ HAUSNARTZEN

Simone de Beauvoir  “ez da emakume jaiotzen, emakume izatera iristen baizik”

Simone de Beauvor-en zita hau aukeratu dut post honi hasiera emateko, esaldi honen harira eztabaida ugari izan baiditut aste hontan, aste interesgarria inolaz ere. “De serie” desberdinak garela sinesten duten askorekin egin dut topo, neska-mutilak berdin hezi baina izatez desberdinak garela baieztatzen dutenak.

Sexu-genero sistema ondo errotuta daukagu gizartean, pertsonen garapena eragozten du, sistema honen arauak betetzen ez dituzten pertsonak baztertuak dira…iazko post  honetan argi eta garbi ikusten da zein den sexu genero sistemaren egitura. Erronka galanta dugu sistema hau deseraiki eta desikasten!

Hezitzaileon erronkak asko dira, oinarrizkoa Genero-Ikuspegia izatea “edozein jarduera edo eremutan emakumeen eta gizonen arteko ezberdinkeriak kontuan hartzen dituen enfokea da”. Irakurgaiak esaten duen bezala ikuspegi honek, hausnarketa, behaketa eta etenik gabeko aztertze lan izugarria exigitzen ditu.

Baliabideei dagokionez nerabeekin lan egiteko aurkitu dudan bideo hau interesgarria da. Watsapeko emotikoiak aztertzen ditu. Gaur egun watsaparen erabilera hain zabalduta egonda, ikasleek harrera ona izango dutelakoan nago. 13-14 urteko gazteekin tutore lanetan nabilenez, bideo hau lantzea pentsatu dut, kontatuko dizuet zein den emaitza.

HEZKIDETZAZ

       Hezi

       Errespetua

      iZaera

      iKasi

       Identitatea

  ereDua

       Elkarlana

eranTzunkizuna

emoZioa

       Aniztasuna

“Hezkidetza neskak zein mutilak genero maskulino eta femeninotik aske heztean datza, bere indibidualtasunaren garapena sustatuz eta gizarte sexista batek eskatzen dizkien errolak kontutan hartu gabe.” Mari Jose Urruzola

Nire inguruan hezkidetzaz galdetu eta erantzun desberdinak jaso ditut, badira hezkidetzaz inoiz ezer entzun ez dutenik, baita hezkidetzako proiekturen batean buru belarri dagoenik ere. Hau horrela, irakurgaian proposatzen diren bost estrategia eraikitzaileak oso lagungarri zaizkidala konturatu naiz hezkidetzan aurrera pausoak emateko: Aliatuak, Esperientzia, Informazioa, Oraina eta Umorea. Ingurukoekin aliatu, esperientziak partekatu, informazioa elkarbanatu, orain arte egindako lana jaso, guzti hau, noski, umorerik galdu gabe. 

Hezkidetzan aritzera bultzatu nauten 5 arrazoi aukeratzekotan hauexek aukeratuko nituzke:

 -Aniztasuna normaltzat jotzeko

-Aske izateko

-Bortizkeria eta indarkeriarekin amaitzeko

-Hizkuntza sexistarekin amaitzeko

-Pertsonen garapen integrala bermatzeko

Beraz gero eta argiago ikusten dut hezkidetza egunerokoan behar haundi bat dela, sexismoa eta genero-estereotipatuak gertatzen dira, guzti honek pertsonen aukerak baldintzatzen ditu eta hau aldatzea denon erantzunkizuna da.

KLIK, KLIK ETA KLIK

Nire egunerokoan badute sare sozialek tokitxo bat, egunero eskeintzen diet tarte bat. Nire kasuan Facebook da erabiltzen dudan sare soziala, badira urte batzuk Facebook en kontu bat ireki eta erabiltzen dudana, hasieran beste herrialde batzutan bizi diren lagunekin harremana mantentzeko erabiltzen nuen, orain berriz “aldizkari” gisa erabiltzen dut, han eta hemengo berriak, iritziak… irakurri, gustoko ditudan gaiei buruzko foroak jarraitu…

Aste honetan ireki dut kontua twitterren, ez naiz orain arte inoiz txioka ibili, egia esan sare bizkor eta dinamikoa iruditu zait, gure bizitza errtimoarekin bat datorrela uste dut. Hala ere, ez dut uste oraindik iritzi bat emateko moduan nagoenik.

Sare sozialak gaur egungo errealitatearen parte dira, uste dut gakoa ERABILERAN dagoela, bakoitzerangan dago erabilera. Batzuk beraien bizitza pertsonala konpartitu eta plazaratzeko erabiltzen dute, beste batzuk berriz erabilera sozialagoa ematen diote, iritziak partekatu, material erabilgarriak eskeini, egoera desberdinak salatu, ideia/egoera desberdinak defendatu… Eta beste hainbat erabilera. Nire iritziz sare sozialak oso baliagarriak dira, elkar konektatu eta komunikatzeko balio dute, klik batekin milaka pertsonengana iristeko gaitasuna dute… 

Hezitzaileontzat ere erabilgarria izan daiteke sare sozialetan presentzia aktiboa izatea, hezkidetzaren kasuan sentsibilizaziorako gune egokia izan daiteke, baita ideiak defendatu eta eztabaidak sortzeko ere.

NIRE AURKEZPENA (OLATZ ARREGI)

Nire izena Olatz da, 2 eta 5 urteko bi umeren ama naiz. Azken 10 urteetan bigarren hezkuntzako irakasle gisa ere banabil han eta hemen.

Bigarren haurtxoaren zai ginela, ginekologoarenetik bueltan, nire amaren dei bat jaso nuen, haurtxoa ondo zegoen... jakin nahi zuen, baita neska ala mutila zen ere, neska zela esan zion, Beraren erantzuna hau izan zen:

-Gizonen mundu honetan aurrera egiteko borroka egiten erakutsi beharko dion.

Zer pentsatua eman zidan erantzun hark eta hemen jarraitzen dut pentsatzen, hausnartzen, ikasten…

Geldik egoten ez dakien hoietakoa naizela diote nire ingurukoek, egia ote… pazientzia ere falta omen zait batzutan, edo askotan…

Ikasteko gogo izugarria omen dut, umetako kuriositatea ez ei dut galdu… hala ote…

Zuekin bidai hau egiteko irrikitan