2020/01/14

Susta dezagun partaidetza


Partaidetza parekidearen inguruan hausnarketarik esanguratsuena berau bultzatzea, aholkulari gisa dinamizazio lanetan dihardugunon funtziorik indartsuenetakoa dugula berretsi dut. Baita irakasleek ere euren geletan, koordinatzaileek lan-taldeetan…

Partaidetza xedeetako bat baita, ez prozedura bat, batzuetan nahasten bada ere. Errepikatu beharrik ez dago pertsona bakoitzaren garapenaz ari garela, rol aktiboaz eta behar den protagonismoa hartzeaz dagokion testuinguruetan.

Horregatik talde dinamikak erabili behar direnean, lehenik, oinarri teorikoak ezagutzea beharrezkoa da eta ziurrenik ohiko papera ere eraldatzea, rol tradizionalek urruntzen baitute horrelako asmoa: giro armonikoa sortu taldekideen artean, ideien zirkulazio librea eta begirunezkoa ahalbidetu eta erraztu, begirada taldean eta partaideengan izan, ez ideia edo pentsamolde desberdinetan, eta jaio daitezkeen ekimenei arreta jarri, partaideengandik datozenek indar biziagoz onartu eta intentsitate handiagoz garatuko baitira.

Oso kontuan hartzekoak taldearen tamaina eta espazio egokiak ere, dituen onura ugariak merezi baitute: taldea norbanakoaren motibazio iturria bilakatzen da, ikuspegi heterogeneoa eskaintzen du, sormena bultzatzeaz gain, prozesuaren parte izanez, irtenbideak bilatzeko ardura baitakar. Diagoloari ateak irekitzen dizkio eta arazo zailenei ere alternatibak aurkitzeko aukerak eman: sozialei, etikoei, ideologikoei…

Beraz  SUSTA ETA GAUZA DEZAGUN PARTEHARTZEA  ETA ERANTZUKIZUNA.

Gaur izan dudan Elkarbizitza-Hezkidetza mintegi saioan ikastetxeetako ordezkariek ikasleen parte-hartzeaz euren praktika azaltzeko aukera izan dute eta pozgarria izan da entzutea Elkarbizitza Behatokietan Haur Hezkuntzako 5 urteko ikasle ordezkariek ere parte hartzen dutela zuzenean ezagutzea. Eta gainerako partaideek zein estrategia erabiltzen dituzten gelakideengandik dakartena eta jarraian eramango dutena komunikatzen laguntzeko. Hori bai ahalduntze prozesua txikitatik indarrean izatea!!


Aurreko edizioetako  posta Yolanda Artorena aukeratu dut, ikasleen parte-hartzeaz eskaintzen digun Jolastokia amesten bideoarengatik. Adibide askoren artean jolastokia da ikasleen parte-hartzea interes handiz piztu dezakeen gaietako bat. Horregatik orain gutxi argitaratu den ESKOLAKO JOLASTOKIAK ERALDATZEKO PROIEKTU PARTE-HARTZAILEAK EGITEKO GIDA ekarri nahi dut hona goian aipatutako partaidetza sustatzeko erronken aurrean baliabide oparo suerta baitaiteke.



iruzkinik ez:

Argitaratu iruzkina