PERTSONA BEZAINBESTE GORPUTZ ETA IDENTITATE

Landu dugun gaiari buruzko ideia bakar bat biltzea erraza egin ez bazait ere, hauxe da hautatu dudana, konplexutasun guztiari irtenbide borobila emateko balioko lukelako:

Genero identitatea, genero adierazpena, sexu biologikoa, sexu orientazioa…asteak aurrera joan ahala, nahiko garbi geratu da pertsonek izateko, sentitzeko, agertzeko, egoteko ditugun amaigabeko konbinaketa, aukera eta prozesu horien guztien ondoriozkoa dela munduan dagoen aniztasun anitza. Nahiz eta aniztasun anitz hori jendarte patriarkalean ikusezin geratzen den askotan edo agertzen bada, modu estereotipatuetan eta hierarkizatuetan egiten dela.

Genero-identitate eta sexu-aukeren errealitate anitzek duten konplexutasuna biltzeko, ezagunak zaizkigun LGTBQI+ siglak, gero eta kategoria berri gehiago biltzen ditu eta hauek presentzia eta lekua eskatzen ari dira: asexuala, alosexuala, heteromalgua, homomalgua, pansexuala, omnisexuala, demisexuala…

Gorputza ere feminismoaren begietan, aldarrikapen eremu garrantzitsua bilakatu da, patriarkatuak egiten duen erabilera salatzeko batik bat. June Fernandezek dioen bezala, “estereotipoak gaindituz, gorputz anitzen indar erotikoa ikertzea ezinbestekoa da, gorputz, desio eta sexu  praktika anitzak politikoki aldarrikatzea behar-beharrezkoa iruditzen zait”.

Norberaren eta gainerako gorputzen aniztasuna era positiboan bizitzea litzateke zilegiena.

Honako bideoan, gaiean landutakoa grafikoki oso modu ulerterrazean azaltzen da: “zer da sexu aniztasuna?”

Sentsibilizaziorako baliagarria izan daiteken  beste bideo bat hauxe, zenbait gazteentzat ispilu izan daitekelako. Bertan, bakarrizketa moduan, gazte batek bere burua definitzen du:

Gida bezala, STEILASek argitaratutako “Genero eta aniztasun sexualerako gidaliburua” egokia dela deritzot, erraz irakurri eta ulertzen delako eta baliabide ezberdinak eskura jartzen dituelako.

Erronka bezala, aipatuko nituzke, batetik:

• Ezer ez aurresuposatzea.
• Konfiantza giroa sustatu askatasunean hitz egiteko ikaskideekin, irakasleekin eta familiekin.
• Eredu hurbilak erakutsi (irakasleak, beste langileak, familiak, ikaskideak) eta eremu zabalean (telebistan, literaturan, komikietan, historian…)
• Genero eta sexu aniztasunaren kontrako hizkera baztertzaileari erantzun. 

Bestetik, heziketa hezkidetzailea izateko:

• Sexu-genero sistema salatu eta gainditu.
• Ikasle bakoitzaren errepikaezintasuna askatasunean garatzeko eskubidean sinetsi.
• Heteronormatibitatetik aldendu.
• Aniztasuna modu ez hierarkikoan, duintasunez eta errespetuz bistaratu.
• Sexu-genero rolak eta genero aginduak betetzen ez dituzten ikasleei inguru
• segurua eskaini.
• Edozein aurreiritziren ondoriozko indarkeria-egoeraren aurrean esku hartu.
• Aniztasun ororen alde eta elkarbizitza positiboaren alde lan egin.
• Heziketa afektibo-sexual ez heteronormatiboa sustatu.

Gainera ikastetxetan (eta beste hainbat espazioetan ere) egunerokotasunean hainbat kontu zaindu beharko lirateke:

•         Izen-emate inprimakiak: familia anitzak kontutan izan.
•         Ikasturtean zehar familiekin egiten ditugun bileretan aniztasunari ematen zaion garrantzia agertu.
•        Sexuen araberako bereizketa ez egin komunetan (komun komunak?)
•        Aldageletan, gorputz guztiek onarpen maila berbera dutela sinestarazi.
•         Izenak: transgeneroen kasuan, nahi duten izenaz ezagutzeko eta deitzeko eskubidea onartu. Ikastetxean nola jokatu zehazten duen protokoloa izan.
•        Formakuntza bultzatu.
•        Liburutegian bermatu aniztasuna agertzen duen liburu sorta, baita aholkatzen diren liburuetan ere.
•         Bultzatu ingurune inklusiboa.
•         Hizkeraren garrantzia. Erabili hizkera inklusiboa, eta adibideetan aniztasuna islatu.
•        Zero tolerantzia irainei, bazterkeriari, bullying-i.

Aurreko edizioetako lanen artean honako POSTa aukeratu dut, gaia ongi laburbiltzeaz gain, baliabide ugari eskeintzen dituelako.

Eta, bukatzeko, KANTU KOLOREk haurrekin lantzeko proposatzen duen Nire gorputza da abestia eta bideoa: