Feminismoak, iraultza eta plazera

 

Aste honetan, feminismoen gaia jorratu dugu Hezkidetza iturriak: feminismoak izeneko irakurgaian. Interesgarria izan da oso, eta orain, hausnartzea egokitzen zaigu

Aurreko urteko lanak irakurri ondoren Unaien lana hartu dut analisirako. Izan ere, berak Uxue Alberdiren lana hartu du eta honek egindako hainbat adierazpen feminista azaldu ditu. Hala, 2019an egindako eta aurten saritua izan den Kontrako Eztarritik saiakera ekarri zuen hausnarketara. Nik, honi, aste honetako elkarrizketa bat gehitu nahi nioke.

Amaia Lekunberri kazetariak Alberdiri Dendaostekoak (Susa, 2020) liburuaren harira elkarrizketa bat egin dio Argia aldizkarian. Liburuak ere feminismoko gai batzuk jorratzeko bidea eman duelako, elkarrizketan zehar hainbat gauzei buruz hitz egiten dute. Hala ere, bada zerbait gustatu zaidana eta hausnartzen jarri nauena: ´Baina aldi berean eman diote beraiek nahi zuten lekua, eta ez diote uko egin irakurtzeari, beren burua janzteari, beste gauza batzuk egiteari, eta niretzako inportantea dena: dibertsioari. Zeren badaukat sentsazioa batzuetan borroka batean sartzen garenean ematen diogula halako zentralitatea eta garrantzia, arintasunez mugitzea ahazten zaigula’. 

Paragrafo hau hainbat aldiz irakurri eta Emma Goldman-ek primeran esan zigun: ‘Ezin badut dantzarik egin, hau ez da nire iraultza!’ esaldia etorri zait burura. Eta pentsatzen hasi naiz, era feminismoan plazerak zein leku duen, ea militantzian plazera non kokatzen dugun. Eta hala, Laura Muelasen aipu honekin topatu naiz.

Elkarrizketan ikusi ahal izango duzuen moduan, berak honakoa dio: ‘Nire sentsazioa da aktibistek pentsatzen dutela militantzian plazererako oso toki gutxi dagoela. Baina praktiketan ikusten dut plazererako espazio asko dagoela. Gauzak, oro har, ez dira egiten plazera lortzeko, baina praktikan, plazer asko dago. Kontua da oso gutxi hitz egiten dugula horri buruz, eta ez dugula kontuan hartzen. Oraindik badago, beharbada, halako ideia multzo bat zehazten duena zer den garrantzitsua eta zer ez, eta beraz, zeri buruz hitz egin behar dugun. Eta horrek lekua jaten dio plazerari’.

Hona ekarri nahi nuen nolabait, feminismoa iraultza bat izateaz gain, plazerarekin duen harremanarekiko lotura. Hezkidetzaren lotura ere ikusten saiatu naiz, eta inguruko irakasleei galdetu diet. Baina ez dit inork erantzun feminismoa curriculum eduki gisa nork aipatu zuen. Agian, hor ere badago iraultza bat egiteke.