“Ezaguna zaizu HEZKIDETZA? Zer da? Zein dira bere jarduera-ildoak?”
galdera hirukoitza bota nien, asteartean,
whatsappez, inolako itzulinguru eta azalpenik gabe, zortzi pertsonari (20 eta 39 urte bitarteko launa gizon eta emakume).
Ez nien kasualitatez haiei bidali, berariaz alboratu nituen “Hezki...zer?” erantzungo zidatela ziur
nekien beste pertsona asko, eta beraiek hautatu nituen talde heterogeneoa
izanik, profil interesgarri eta osagarriak zituztelako: haur hezkuntzako
irakasle bat, bigarren hezkuntzako bi irakasle, unibertsitateko irakasle bat (ekonomialaria
ikasketaz), bi ikasle (bata irakasle-eskolakoa eta bestea ingeniaritzakoa),
unibertsitateko administrazio eta zerbitzuen pertsonaleko langile bat (bere
garaian irakasle-ikasketak egindakoa eta bi semeren guraso) eta admnistrazioko
bi langile (hezkuntzarekin zerikusirik ez duten gaietan, bata biologia eta
bestea arte ederrak ikasia).
Emaitzak argigarriak
izan ziren (eta, aurreikustekoak izanagatik, baita apur bat etsigarriak ere):
derrigorrezko hezkuntzako irakasleek eta irakasle-ikasketak egindakoek zekiten
soilik zer zen hezkidetza.
Irakasle-ikasketak egiten ari den ikasleak speech hau bidali zidan, haur
hezkuntzako irakasleak aldarrikatu zuen hezkidetzaren bidez lortu behar dugula “gizon
eta emakumeen rol historikoen birplanteamendua, hausnarketa eta birdefinizioa
gaur egungo gizartea aldatzeko eta etorkizuneko jendartea eraikitzeko” eta
bigarren hezkuntzako irakasleetako baten arabera “hezkidetza lortzeko gaur
egungo hezkuntza sistemaren inguruko hausnarketa sakona egin behar dugu eta,
gizartean bezala, oinarrietatik hasi berdintasun errealean errotutako sistema
sortzen”. Eta nik diot, aste
honetako materialak ikusi eta foroko eztabaidetako ikaskideen argudioak
irakurri eta gero:
Hamaika diren arren hezkidetzaren alde aipa daitezkeen
arrazoiak (horietako batzuk aletzen dituzte Nagore Larrazabalek eta Ibai
Fresnedok irakurtzea zinez merezi duen elkarrizketa
honetan), bost aukeratzekotan hauek nabarmenduko nituzke:
·
Sexismoa deuseztatzeko eta androzentrismoa
iraultzeko…
·
Emakumeen kontrako indarkeria desagerrarazteko…
·
Sexu-generoagatik ematen diren desberdinkeriak
gainditzeko…
·
LGTBIfobia, arrazismoa eta bestelako
bazterkeriak errotik saihesteko…
·
Jende askez osatutako jendarte zoriontsua
eraikitzeko…
… horregatik guztiagatik, eta aldatu ezean, goazen bidetik
pikutara goazelako: aitzakiarik ez, hezkidetza!
Aurreko edizioetako ikasleek ere hausnartu zuten gai beraren
inguruan eta blog honetan bertan #Hezkidetza etiketapean beren iritziak partekatu.
2017ko Irati Gaztelurrutiaren hau
gustatu zait bereziki, gaia familia-bazkari batean mahaigaineratu eta belaunaldiarteko
elkarrizketa eragin zuelako.
iruzkinik ez:
Argitaratu iruzkina