EMAKUMEEN ERREPRESENTAZIOA ETA DENBORAREN ERABILPENA

EMAKUMEEN ERREPRESENTAZIOA ETA DENBORAREN ERABILPENA

Gai honetan “errepresentazioa eta denboraren erabilpena” aztergai izan dugu. Emakumearen isla bizitzako esparru desberdinetan nolakoa den  eta nolakoa izan den hausnartuez gero, oso errepresentazio urria dela ikusi dugu. Bestetik ere,  gaur egun eremu digitalean emakumea adierazten den modua ere aztergai izan dugu. Eta azkenik, emakumeari eskaintzen zaion denborari erreparatu zaio.

Nire ustez, ebidentzia hauek ikuspegi androzentrikoa islatzen dute argi eta garbi. Izan ere, rol maskulinoa gainontzen da gure artean eta horrek rol femeninoa ahuldu egin du.

Hala nola, hirigintzan, eskoletan eta bestelako espazio publikoetan emakumeak azaltzen duen errepresentazioa tamalgarria da. Bakarrik %10eko kale, plazak, e.a-en izenak dira emakumeenak, esaterako. Honen inguruko ikerketa desberdinak egin dira. Horien artean IDEMekoa oso interesgarria iruditu zait. Honen arabera hirien erabilera diskriminatzailea da eta hirigintzaren kontzeptualizazio bera ere bai, ikuspegi androzentriko horren baita diseinatuta daudelako.

Eskolen jolas-tokien espazioari dagokionez, polemikoa suertatu den kontua da hau. Izan ere, komunikabideek horren erabilera okerra egin dute jendea nahastuz. Nik uste dut gai hau ez dela behar den bezala azaldu eta gaizki ulertuak sortu direla. Espazio honen erabileraren inguruan egindako ikerketa lanek baieztatzen dute erabilera sexista agertzen dela. Honen aurrean proposamen konkretuak azaldu arren, gutxi dira aurrera kementsu plangintza serio bat daramaten ikastetxeak. Gainera, oposizio gogorra azaltzen da behin eta berriz futbola ukitu izan denean. Berdintasunaren aldeko borroka honetan parekotasun baten bila ibili ezean, nagusi eta guztiz ahalduna den kirol batekin ere topo egiten dugu, futbola. Futbola gaur egun kirol nagusia da, munduko masa gehiena mugitzen duena eta hau horrela den heinean, hezkidetzak mundu oso baten kontra talka egiten du. Berez, berdintasuna ahalbideratzea zaila bada, futbolarekin ari garenean are gehiago zailagoa. Kontu honekin gauzak nahasmenerako eman daitezke, askotan badirudi futbolaren kontra egon behar dela hezkidetza lantzeko eta hau ere ez du zergatik izan behar. Futbolak ezaugarri positibo asko ditu baina honen erabilera mediatikoa eta bihurtu duen merkantilismoa da kalte gehien egin diona, ez bakarrik hezkidetzari baizik eta gizarte osoari.

Ikastetxean gai honi seriotasunez heltzeko Elkarbizitzako Behatokitan planteatzea eta proposamenak ekartzea proposatuko nuke. Izan ere, ikastetxean parte hartzen duten eragile guztien ekarpenak aztergai izatea denon kontsentsua lortzeko bidea izan daiteke. Gainera, batzorde honek duen eginkizunetako bat elkarbizitzari onurak ekar lizkiokeen ekarpenetan datza. Gogoeta sakona eskolako estamentu guztietan martxan jartzea, irakasleengandik hasita, ikasleetara, guraso eta AZPko pertsonalgoarengana iritsiz. Denen artean, gaia behar den bezala bideratuz irtenbide jasangarriak ekar dakiokegu gure ikastetxeko espazioei.

Gure hiri zein herritako espazioei erreparatuz, emakumeen errepresentazioa areagotzeko emakume pertsonaia desberdinak proposatu nituzke, “Emakumeak eta hiria” foroak egin duen proposamenarekin bat eginez.

Esate baterako Donostiako hirian honako hauek izan daitezke horietako emakume batzuk:

- Las Cigarreras, Tabakaleraren inguru enparantzan jartzeko aukera egokia izan daiteke.

- Iñudearen lanbidea Donostiako historian izan duen garrantzia islatu daiteke.

- Casilda, Egiako militante anarkista eta feminista izan zen, hondartzan nudismoa praktikatzeagatik ezaguna izan zelarik. Faszismoaren kontra biziki borrokatu zuen baita ere frankismoa eta nazismoaren kontra.

- Menchu Gal margolaria bere obrarengatik ezaguna

-  Lourdes Iriondo abeslariak antzerki obrak eta haurrentzako narrazioak idatzi zituen.