2016/01/31

Orientazioa eta aukerei buruz hausnartzen

Jaiotzen garenean ditugun genitalen arabera sexu bat ezartzen zaigu eta horren arabera generoa osatuko duten ezaugarri, rol eta funtzio batzuk ere. Ar edo eme garen esango digute, eta horren arabera, gizon edo emakume izan behar dugu. Bata edo besteari lotutako ezaugarri sozialak izan behar ditugu, bestela, ez gara “normalak” edo “naturalak” izango. Norbere identitatea eraikitzea prozesu kulturala da, eta genero ideologia hegemonikoak hori baliatzen du beste genero identitate aukera oro baztertzeko, mundua genero maskulino eta femeninoaren arabera antolatzeko. Ondorioz, orientazioan genero ikuspegitik ikertu, pentsatu eta planifikatzea funtsezkoa da. Eskola hezkidetzaileak sexu bakoitzari erreserbatzen dizkion balio eta praktikak neska eta mutilei transmititu behar dizkie, bereziki nesken jarrera eta praktikak birbaliotu eta oreka lortzeko mutilengan garatu, alderantzizkoa neurri handi batean jadanik gertatu baita.
 
Haur eta gazteek sozializazio prozesu osoan, kanpoko presioa jasan behar dute (familia, lagunak, telebista…) eta honek, hartu beharreko erabakietan eragiten die, Emakundek egindako “Portaera maskulinoen eta femeninoen ereduak eta erreferenteak euskal gazterian” txostenean ikusi daiteke hori. Txostenaren arabera, gaur egungo gazteak berdintasunaren diskurtsoarekin hezita daude. Jendarteratzean, ordea, berdintasunik eza eta askotan bazterketa sortzen duten genero eredu eta erreferenteekin jendarteratu dira.
Egindako ikerketa lanak erakusten du bizitzan egiten ditugun aukeraketak ez direla kasualitatea, kausalitatea baizik, eta sexu-genero sistemak eragina duela horretan. Besteak beste, sexu-genero sistemak ikasketak, enplegua eta ordainduriko lanaren banaketa ere baldintzatzen ditu. Horregatik, orientazioan genero ikuspegitik ikertu, pentsatu eta planifikatzea funtsezkoa da.
Orientazio eta tutoretza hezkidetzailerako  erronkak beraz, ondorengoak lirateke:
-          Emakume izateko eta emakumeen egoteko erak baloratzea.
-          Generoarekin erlazionaturiko aurreiritzien kritika.
-          Berdintasunezko hezkuntza afektiboa garatzea.
-          Elkar ardura eta zaintza tutoretzan sartzea.
-          Parte hartze parekidea sustatzea
-          Lanbidea izatearen garrantzia indartzea.
-          Bizitza mota eta lanbide anitzen eredu ez-estereotipatuak aurkeztea.

iruzkinik ez:

Argitaratu iruzkina