2016/02/28

GATAZKEN INGURUAN HAUSNARTZEN

Aste honetan ikusi dugun gisan, garrantzitsua dugu harremanak nola eraikitzen ditugun jabetzea eta zentzu horretan gatazkei aurre egiteko moduetan generoak duen eraginaz ohartzea.

Gatazkak beldurra sortzen digu, gertaeran behar den adinako arreta jarri eta aztertzeko joerarik ez dugu izaten, behar bezala bideratu beharrean, horrek sortzen digun beldurrak gatazkak albo batean ustera bideratzen gaitu, beraz zerbait negatibo gisa kokatu izan dugu. Gatazka aldiz ez da ez negatiboa ez positiboa. Gatazka konpontzeko modua izango da negatiboa edo positiboa.


Gatazka ulertzeko modu ezberdinak daudela ikusi dugun arren, komunikazioa eta harreman egokiak funtsezkoak izango dira ahalik eta modu egokienean kudeatzeko. Elementu hauek falta ezean eta gatazkaren trataera errespetuzkoa ez denean, askotan indarkeria agertzen da.

Gatazken inguruko liburu hau irakurtzera gonbidatzen zaituztet. Merezi du:

 

Generoak eragin zuzena du gatazkaren baitan. Emakume eta gizonen arteko botere harremanak gatazketan ere isla baitira. Zentzu horretan sexu bakoitzaren testuingurua eta boterea abiapuntutzat hartzea ezinbestekoa izango da benetan gatazka eta gatazkaren prozesua ahalik eta parekatuena izan dadin. 
 
Gatazken aurrean, emakumeok hartu ohi dugun rola datorkit burura. Beste karga bat gehiago emakume izate hutsagatik. Emakumeok askotan, pentsatzen eta sentitzen duguna adierazteko zailtasuna dugu, besteei min egitearen beldurraz. Batez ere besteengan atseginak izatea erakutsi digutelako, hori baita emakume on baten figura. Zentzu horretan garrantzitsua iruditzen zait emakumeok gatazken aurrean ere ahalduntzea.

Bestetik gatazkaren baitan, euskaldun emakume gisa, gure herriaren gatazkan emakumeok izan dugun eta jokatzen dugun papela datorkit burura. Jule Goikoetxeak egindako aipamen bat konpartitu nahiko nuke:
Gure gizarte patriarkal normalizatuan gatazka dago baldin eta gizonek elkar akabatzen badute, eta bakea ezartzen da, aldiz, baldin eta gizonek akordioa sinatzen badute”. Hau da, Euskal Herrian azken hamar urteotan hamaika emakume erail dituzte emakume izateagatik, baina euskal gatazka aipatzen denean, normalean, ez gara horretaz ari.

Hau guztia lantzeko erronkak:
-Gatazkaren inguruko konotazio negatiboari buelta ematea.
-Gatazkak mahai gainean jarri eta hauek modu egokian bideratzeko bitartekoak eskuragarri jartzea.
-Pertsona ororen iritziak, pentsamenduak... ados egon edo ez errespetatuak izatea.
- Irakasle nahiz gurasoei gatazkak modu egokian kudeatzeko tresnak eskaintzea (formazioa)
-Gatazketan generoak duen eraginaz jabetzea.
-Elkar entzuketa aktiboa bultzatzea.
-Tratu ona eta elkarren zaintza norberarengan eta besteengan sustatzea.










iruzkinik ez:

Argitaratu iruzkina