2016/02/07


IDENTITATEEN GARAPENA

Horretaz hitz egiten hasteko, kontzeptu batzuen esanahia argitu dizkigute. Identitatea eta autokontzeptua ez dira gauza bera. Autokontzeptuak bi osagai ditu: kognitiboa eta emozionala. Identitatea eraikuntza pertsonala eta eraikuntza soziala da.

Bestalde, sexu-identitatea eta genero-identitatea ere desberdinak dira. Sexu-identitatearen kasuan zailtasunak agertzen dira hermafrodita edo intersexuala jaiotzen direnekin. Nola sailkatu?  Genero-identitatea norbera gizon, emakume edo bestelakorik izatearen pertzepzio subjektiboari dagokio. Indarrean dauden maskulinitate-kodeak eta feminitate-kodeak zein arauak dira pertzepzio hori bideratzen dutenak. Une historiko ezberdinetan eta baita eremu geografiko desberdinetan aldatu daiteke. Horregatik esaten da eraikuntza soziokulturala dela.

Identitateak anitzak dira. Horregatik, euren kontzeptualizazioak ere anitzak izan behar dute: zisgenero, zisexual, transgenero, transexuala, trabesti, quuergenero, hirugarren generoa, ageneroa, intergeneroa, androginoa, bigeneroa, genero jariakorra, poligeneroa, pangeneroa, sasi-gizona/sasi-emakumea eta trans*.

Genero-identitatea eta genero-adierazpena ez dira gauza bera. Horretarako adibide bat izan daiteke trans pertsonak.
 

Genero-identitatearen garapenak edo erainkuntzak esan nahi du gu garela egiten duguna. Identitate egonkorra izan beharrean, hautatua izan beharrean … aldarrikatu egin behar dena da bizitzan egoteko modu bat dela. Ez da izateko modu bat, baizik eta egoteko modu bat.

Nire ustez irakurgaian dagoen genero-identitatearen sailkapena (16 terminoak) ez dago behar den moduan hedatua. Nik neuk 16 horiek guztiak ez nituen ezagutzen. Transexuala, trabesti eta androginoa dira ezagunenak, behintzat niretzat. Hirugarren generoaren kasua oso bitxia iruditu zait. Aukerak nik ezagutzen nituenak baino askoz gehiago daudela ikasi dut. Zerrenda hori ikastetxetan ikasi beharko luketelakoan nago.

Ikastetxean eta ikastetxetik kanpo ere “gizakia” beste era batean ulertuko bagenu, askeagoak izango ginateke. Ulertzen bada gizakia substantzia bat dela, esentzia bat duela … ez da kontuan hartzen bere existentzia. Sartrek, Simone de Beavoirrek eta Ortega y Gasetek (gertuago) aldarrikatu izan zuten EXISTENTZIAren inportantzia, esentziaren gainetik.

HEZIBERRI 2020ko proiektuan ELKARBIZITZARAKO KONPETENTZIAn horrela dio: “Pertsonen arteko, taldeko eta komunitateko egoeretan elkarrekikotasunez parte hartzea, eta norberari aitortutako eskubideak eta betebeharrak besteri aitortzea, norberaren zein guztion ongirako”. Bere garapena bermatzeko curriculum ezkutuan kontuan hartu beharko genuke:
-          Besteen eskubideak aitortzeko lehenik eta behin ezagutu behar dira zeintzuk diren genero-identitate guztiak. Ez bakarrik ezagunenak.
-          Gure ikastetxean heterosexualak ez diren ikasleak izango ditugu, eta euren inguruan ezagutuko dituzten pertsonen kopuru bat ohikoak ez diren genero-identitatekoak izango dira. Beraz, naturaltasunez hartzeko gai bat izan behar da.

http://errespetuz.blogspot.com.es/




GENERO-IDENTITATEEN INGURUAN EMANDAKO AURRERAPENAK

Nire garaian, ikaslea nintzela, ikastetxean ez zen homosexualitateaz hitz egiten. Orain, berriz, bai (publikan). Lehen, kaletik ez ziren sexu bereko bi pertsonak musuka edota eskutik helduta ikusten. Orain, berriz, bai. Maiz ikusten ditut. Eta, horrekin batera, homosexualek orain badute guraso izateko eskubidea. Lehen telebistan homosexualak oso gutxi agertzen ziren eta transexualak gutxi batzuk oritzen ditut nik: La Veneno eta Bibi Andersen. Baina, besterik ez. Orain, berriz, Eurovisión batean parte hartu zuen transexual batek. Pertsona ezagunek, famatuek aldarrikatu izan dute azken urte hauetan homosexualak direla, politikoak barne.


 

Nire ustez, desegin behar izan diren sinesmen faltsuak hauek dira:
-          Homosexualak baziren gurasoak, homosexuala izango zela seme/alaba. Hori ikasiko baituen etxean.
-          Homosexualitatea eta transexualitatea gaixotasun mentaltzat hartzen ziren. Homosexualitatearen kasuan 1973ra arte eta transexualitatearena 2013ra arte, APAn (Asociación Americana de Psiquiatría) horrela agertzen ziren.
 -      Sinesmen askotan bezala, genero-identitatean ere Eliza Katolikoak badu erantzukizuna.


 
 
 
 




 

iruzkinik ez:

Argitaratu iruzkina